انڈونیشیا میں ہیلی کاپٹر گر کرتباہ، 8 افراد جاں بحق

انڈونیشیا کے صوبے مغربی کلیمنتان میں ایک نجی کمپنی کا ہیلی کاپٹر گر کر تباہ ہو گیا، جس کے نتیجے میں ملائیشین شہری سمیت تمام 8 افراد جاں بحق ہو گئے۔

مقامی کمپنی ‘میتھیو ایئر نوسانتارا’ کی ملکیت یہ ایئربس ہیلی کاپٹر گزشتہ صبح پرواز بھرنے کے محض پانچ منٹ بعد ہی ایئر ٹریفک کنٹرول سے رابطہ کھو بیٹھا تھا۔ سول ایوی ایشن کے ڈائریکٹر جنرل لقمان ایف لیسا نے تصدیق کی ہے کہ سرچ اینڈ ریسکیو ٹیموں نے دشوار گزار پہاڑی اور گھنے جنگلاتی علاقے میں حادثے کی جگہ کا سراغ لگا لیا ہے، جہاں موجود تمام مسافروں اور عملے کے ارکان کی موت کی تصدیق ہو چکی ہے۔ تمام لاشوں کو صوبائی دارالحکومت پونتیانک منتقل کیا جا رہا ہے۔

انڈونیشیا، جو ہزاروں جزائر پر مشتمل ملک ہے، نقل و حمل کے لیے فضائی سفر پر شدید انحصار کرتا ہے، تاہم یہاں فضائی حفاظت کا ریکارڈ کافی کمزور رہا ہے۔ رواں سال جنوری میں بھی سولاویسی جزیرے پر ایک طیارہ حادثے میں 10 افراد ہلاک ہوئے تھے، جبکہ گزشتہ سال ستمبر میں کلیمنتان اور پاپوا کے علاقوں میں ہونے والے دو مختلف ہیلی کاپٹر حادثات میں مجموعی طور پر 12 افراد اپنی جانوں سے ہاتھ دھو بیٹھے تھے۔