ملک کے بیشتر علاقوں میں بارش کی پیشگوئی، مغربی ہواؤں کی شدت میں اضافے کا امکان

محکمہ موسمیات اور نیشنل ایمرجنسی آپریشنز سینٹر (NEOC) نے ملک کے بیشتر علاقوں میں شدید بارشوں، طوفانی ہواؤں اور ژالہ باری کی پیشگوئی کرتے ہوئے الرٹ جاری کر دیا ہے۔ موسمیاتی ماہرین کے مطابق ملک میں داخل ہونے والے مغربی ہواؤں کے سلسلے کی شدت میں اضافے کا قوی امکان ہے، جس کے باعث بالائی خیبر پختونخوا، آزاد کشمیر، گلگت بلتستان، خطہ پوٹھوہار اور وفاقی دارالحکومت اسلام آباد میں گرج چمک کے ساتھ مائل بہ کرم بارش کا امکان ظاہر کیا گیا ہے۔

این ای او سی کے مطابق موسمیاتی نظام 30 ستمبر تک پنجاب اور خیبر پختونخوا کے مختلف اضلاع سمیت لاہور، گوجرانوالہ، راولپنڈی اور مری کو متاثر کرے گا۔ اس دوران پہاڑی علاقوں اور برساتی ندی نالوں میں اچانک طغیانی جبکہ شہری علاقوں میں سیلابی صورتحال (فلڈنگ) کا شدید خدشہ ظاہر کیا گیا ہے۔ ادارے نے مسافروں، سیاحوں اور مقامی انتظامیہ کو الرٹ رہنے اور ہنگامی تدابیر اختیار کرنے کی ہدایت کی ہے۔