قذافی اسٹیڈیم لاہور میں پی ایس ایل آکشن ورکشاپ، محسن نقوی کی خصوصی شرکت

لاہور کے قذافی اسٹیڈیم میں ایچ بی ایل پاکستان سپر لیگ (پی ایس ایل) کے آئندہ سیزن کے حوالے سے آکشن ورکشاپ کا انعقاد کیا گیا، جس میں چیئرمین پاکستان کرکٹ بورڈ محسن نقوی نے خصوصی شرکت کی۔

ورکشاپ کے دوران کھلاڑیوں کو فرنچائزز میں برقرار رکھنے کی تعداد کے حوالے سے تفصیلی مشاورت کی گئی۔ اس موقع پر محسن نقوی نے کہا کہ تمام فرنچائزز کو یکساں لیول پلینگ فیلڈ فراہم کی جائے گی تاکہ شفاف اور منصفانہ آکشن پراسیس کو یقینی بنایا جا سکے۔

پی ایس ایل کے چیف ایگزیکٹو آفیسر سلمان نصیر نے آکشن ورکشاپ کے خدوخال پر تفصیلی بریفنگ دی، جبکہ کھلاڑیوں کے آکشن پراسیس اور سکواڈ تشکیل دینے کے قواعد و ضوابط سے بھی آگاہ کیا گیا۔

ورکشاپ میں فرنچائزز کے عہدیداروں اور کھلاڑیوں نے آکشن پراسیس سے متعلق اپنی تجاویز پیش کیں۔ اس موقع پر فرنچائزز کے عہدیداروں، چیف فنانشل آفیسر پی سی بی، ڈائریکٹرز انٹرنیشنل کرکٹ، کمرشل، میڈیا اور دیگر اعلیٰ حکام نے بھی شرکت کی۔