گل پلازہ سانحہ، جوڈیشل کمیشن نے فریقین کی ذمہ داریوں کا تعین کر دیا

سانحہ گل پلازہ کے حوالے سے قائم جوڈیشل کمیشن کے سربراہ جسٹس آغا فیصل نے رپورٹ جاری کر دی ہے، جس کے دیباچے میں مصطفیٰ زیدی کا مشہور شعر شامل کیا گیا ہے۔ رپورٹ میں حادثے کی مجموعی ذمہ داری گل پلازہ انتظامیہ، فائر بریگیڈ، سول ڈیفنس، ڈسٹرکٹ ایڈمنسٹریشن (ڈی سی ساؤتھ)، ریسکیو 1122 اور ایس بی سی اے (SBCA) پر عائد کی گئی ہے۔ کمیشن کے مطابق عمارت خطرناک اور فائر سیفٹی قوانین کی شدید خلاف ورزی کی حالت میں تجارتی استعمال میں رہی، جہاں فائر بریگیڈ کو اطلاع دینے میں تاخیر کی گئی اور بجلی کی منقطع کاری نے اندھیرے کے باعث انخلا کے امکانات مزید کم کر دیے۔ رپورٹ میں نشاندہی کی گئی ہے کہ سول ڈیفنس کے نوٹسز کے باوجود قانونی کارروائی نہیں کی گئی، جبکہ فائر بریگیڈ کی پہنچنے میں تاخیر اور پانی کی کمی کے باعث ریسکیو متاثر ہوا۔ جوڈیشل کمیشن نے قرار دیا کہ عمارت میں جانی نقصان صرف آگ سے نہیں بلکہ اداروں کی غفلت، تاخیر، بند راستوں اور غیر فعال حفاظتی نظام کی وجہ سے ہوا۔