گورنر سندھ کا عمران کے وکلاء کو بہتر طریقے سے کیسز کی پیروی کا مشورہ

کراچی: گورنر سندھ نہال ہاشمی نے بانی پی ٹی آئی عمران خان کے وکلاء کو مشورہ دیا ہے کہ وہ کیسز کی پیروی بہتر طریقے سے کریں تاکہ قانونی نتائج حاصل ہو سکیں۔ یومِ پاکستان کے موقع پر مزارِ قائد پر حاضری کے بعد میڈیا سے گفتگو کرتے ہوئے گورنر سندھ نے واضح کیا کہ بانی پی ٹی آئی کی رہائی حکومت کا نہیں بلکہ عدالتوں کا کام ہے؛ اگر عدالت انہیں بے گناہ سمجھے تو رہا کر دے، حکومت عدالتی معاملات میں مداخلت نہیں کر سکتی۔

نہال ہاشمی نے اپنی سیاست کے محور پر روشنی ڈالتے ہوئے کہا کہ وہ اقتدار کی نہیں بلکہ اقدار کی سیاست پر یقین رکھتے ہیں اور انہیں فخر ہے کہ ان کا تعلق بانیِ پاکستان کی جماعت سے ہے۔ انہوں نے اپنے قائد نواز شریف کے وژن کا ذکر کرتے ہوئے کہا کہ مسلم لیگ (ن) کی سیاست کا مقصد پاکستان کو مضبوط بنانا ہے۔

گورنر سندھ نے مزید کہا کہ وہ خود کو آئین سے ماورا نہیں سمجھتے اور صوبے کی ترقی کے لیے وزیراعلیٰ مراد علی شاہ کے ساتھ مل کر سندھ کی خوشحالی کے لیے کام کریں گے۔ اس سے قبل گورنر سندھ اور وزیراعلیٰ سندھ نے کابینہ ارکان کے ہمراہ مزارِ قائد پر پھولوں کی چادر چڑھائی اور فاتحہ خوانی کی۔