گورنر پنجاب سے پیپلز پارٹی رہنماؤں کی ملاقاتیں، سیاسی صورتحال پر گفتگو

لاہور: گورنر پنجاب سردار سلیم حیدر خان سے پیپلز پارٹی کے سینیئر رہنماؤں قمر زمان کائرہ، جہاں آرا وٹو اور منشاء اللہ بٹ نے الگ الگ ملاقاتیں کیں۔ ان ملاقاتوں کا محور ملک کی مجموعی سیاسی صورتحال اور مستقبل کا لائحہ عمل رہا۔ گورنر پنجاب نے واضح کیا کہ پیپلز پارٹی نے ہمیشہ ذاتی مفاد پر قومی مفاد کو ترجیح دی ہے اور موجودہ حکومت کے ساتھ اتحاد بھی اسی وسیع تر قومی مفاد کا حصہ ہے۔

گورنر پنجاب نے بلاول بھٹو زرداری کی قیادت پر بھرپور اعتماد کا اظہار کرتے ہوئے کہا کہ وہ نوجوانوں کے حقیقی لیڈر ہیں اور ملک کی نوجوان نسل انہیں وزیراعظم بنانے کے لیے اپنا بھرپور کردار ادا کرے۔ انہوں نے احتجاجی سیاست کو مسترد کرتے ہوئے کہا کہ پاکستان اس وقت کسی بھی قسم کے انتشار کا متحمل نہیں ہو سکتا، تمام جماعتوں کو چاہیے کہ وہ ملکی تعمیر و ترقی کے لیے ایک صفحے پر رہیں۔

سفارتی محاذ پر ایک بڑی پیش رفت کا تذکرہ کرتے ہوئے سردار سلیم حیدر خان نے کہا کہ آج دنیا پاکستان کو قدر کی نگاہ سے دیکھتی ہے۔ انہوں نے انکشاف کیا کہ ایران اور امریکہ کے درمیان جنگ بندی اور تناؤ میں کمی کے لیے پاکستان ایک ‘کلیدی ثالث’ کا کردار ادا کر رہا ہے، جو کہ ملکی خارجہ پالیسی کی ایک بڑی کامیابی ہے۔