فارن فنڈنگ کیس: “چالان مکمل، 2 نئے ملزمان کا اضافہ،” ایف آئی اے کی بینکنگ عدالت میں رپورٹ؛

اسلام آباد: بینکنگ عدالت کے جج عبدالغفور کاکڑ نے بانی پی ٹی آئی اور دیگر کے خلاف فارن فنڈنگ کیس کی سماعت کی۔ سماعت کے دوران اسپیشل پراسیکیوٹر واثق ملک عدالت میں پیش ہوئے اور بتایا کہ کیس کا تفتیشی افسر طبیعت کی ناسازی کے باعث آج عدالت میں حاضر نہیں ہو سکا۔

پراسیکیوٹر واثق ملک نے عدالت کو اہم معلومات فراہم کرتے ہوئے بتایا کہ ایف آئی اے نے کیس کا چالان مکمل کر لیا ہے جو جلد عدالت میں پیش کر دیا جائے گا۔ انہوں نے مزید انکشاف کیا کہ تحقیقات کے دوران کیس میں 2 مزید ملزمان اور 1 نئے گواہ کا اضافہ کیا گیا ہے۔ ایف آئی اے نے بانی پی ٹی آئی سمیت دیگر نامزد افراد کے خلاف منی لانڈرنگ اور دیگر دفعات کے تحت مقدمہ درج کر رکھا ہے۔

عدالت نے ایف آئی اے کو ہدایت کی کہ اگلی سماعت پر ہر صورت تفتیشی چالان جمع کروایا جائے۔ بعد ازاں، کیس کی سماعت 14 اپریل تک ملتوی کر دی گئی، جبکہ کیس میں نامزد ملزمان سراج احمد اور فیصل قاضی کی عبوری ضمانت میں بھی 14 اپریل تک توسیع کر دی گئی ہے۔