ایران جنگ کے باعث متاثر ہونے والا فضائی آپریشن بتدریج بحال ہونا شروع

مشرقِ وسطیٰ میں ایران، امریکہ اور اسرائیل کے درمیان حالیہ شدید کشیدگی کے بعد پیدا ہونے والی غیر یقینی صورتحال میں بہتری کے ساتھ ہی پاکستان کا فضائی آپریشن دوبارہ پٹری پر لوٹ آیا ہے۔ ایوی ایشن ذرائع کے مطابق، ملکی اور غیر ملکی ایئر لائنز نے اپنے معمول کے آپریشنز بحال کرتے ہوئے نئے فلائٹ شیڈولز جاری کر دیے ہیں۔

لاہور کے علامہ اقبال انٹرنیشنل ایئرپورٹ سمیت کراچی، اسلام آباد، پشاور، ملتان اور کوئٹہ کے ہوائی اڈوں سے خلیجی ممالک کے لیے پروازوں کی آمد و رفت میں تیزی آگئی ہے۔ قطر ایئرویز، ایمریٹس، سعودیہ اور کویت ایئرویز جیسی بڑی ایئر لائنز نے نہ صرف اپنا آپریشن بحال کیا ہے بلکہ حج سیزن کے پیشِ نظر خصوصی پروازوں کا آغاز بھی کر دیا ہے۔

پاکستان ایئرپورٹس اتھارٹی (PAA) نے اس حوالے سے تمام انتظامات کو حتمی شکل دے دی ہے تاکہ عازمینِ حج اور عام مسافروں کو کسی دشواری کا سامنا نہ کرنا پڑے۔