قومی اسمبلی میں وزیرِ خزانہ کی اہم بریفنگ: ٹارگٹڈ سبسڈی کا آغاز، عالمی تیل بحران کے باوجود زرمبادلہ ذخائر مستحکم

قومی اسمبلی کے اجلاس میں وفاقی وزیرِ خزانہ محمد اورنگ زیب نے ملک کی معاشی صورتحال اور عالمی تیل بحران پر بریفنگ دیتے ہوئے انکشاف کیا ہے کہ حکومت کی جانب سے ٹارگٹڈ سبسڈی کی پہلی قسط عوام تک پہنچنا شروع ہو چکی ہے۔ انہوں نے بتایا کہ صوبوں کے پاس موجود الیکٹرانک ڈیٹا کے ذریعے سبسڈی کی براہِ راست فراہمی کا عمل باقاعدہ شروع ہو چکا ہے۔ عالمی حالات پر تبصرہ کرتے ہوئے انہوں نے کہا کہ یو اے ای جیسے ممالک میں بھی پیٹرول اور ڈیزل کی قیمتوں میں 30 سے 70 فیصد تک اضافہ ہوا ہے، لیکن پاکستان میں کرونا کے تجربات سے سیکھتے ہوئے تیل بحران کے اثرات سے نمٹا جا رہا ہے۔ ان کا کہنا تھا کہ تیل و گیس کے بڑھتے ہوئے بلوں پر حکومت کی نظر ہے، تاہم اب تک ملکی زرمبادلہ کے ذخائر پر کوئی منفی فرق نہیں پڑا اور حکومت اسی ہفتے 1.4 ارب ڈالر کے یورو بانڈز سمیت دیگر بین الاقوامی ادائیگیاں کرنے کے لیے تیار ہے۔

وزیرِ خزانہ نے اداروں کی اصلاحات کے حوالے سے بتایا کہ 26 اداروں کو نجکاری کمیشن کے حوالے کر دیا گیا ہے، جبکہ یوٹیلیٹی اسٹورز جیسے اداروں میں سبسڈی کے نام پر ہونے والی کرپشن کو روکنے کے لیے اقدامات کیے جا رہے ہیں۔ انہوں نے پی ڈبلیو ڈی (PWD) طرز کے اداروں کی بندش کی طرف اشارہ کرتے ہوئے کہا کہ بعض ادارے نجکاری کے قابل ہی نہیں تھے۔ مستقبل کی حکمتِ عملی پر بات کرتے ہوئے محمد اورنگ زیب نے کہا کہ وزیراعظم نے اگلے 8 سے 10 سالوں کے لیے ‘کلین انرجی ٹاسک فورس’ تشکیل دے دی ہے تاکہ ملک کو ‘کلین اینڈ گرین انرجی’ پر منتقل کیا جا سکے۔ انہوں نے دعا کی کہ خطے میں امن قائم ہو اور پاکستان کی امن مذاکرات کی کوششیں کامیاب ہوں تاکہ توانائی کا عالمی بحران مزید سنگین نہ ہو۔