چھوٹے دکانداروں کے لیے خصوصی ٹیکس اسکیم نفاذ کے ابتدائی مرحلے میں ہے، تمام تکنیکی مشکلات دور کر رہے ہیں: ایف بی آر

فیڈرل بورڈ آف ریونیو (FBR) نے واضح کیا ہے کہ چھوٹے دکانداروں کے لیے متعارف کروائی جانے والی خصوصی ٹیکس اسکیم اس وقت نفاذ کے ابتدائی مرحلے میں ہے، اور اس اسکیم کی رجسٹریشن کے دوران تاجروں کو درپیش عملی اور تکنیکی مشکلات کو دور کرنے کے لیے ہنگامی بنیادوں پر اقدامات جاری ہیں۔

ایف بی آر کے مطابق حکومت اور ادارہ تاجر برادری کے ساتھ مسلسل رابطے میں ہے اور مارکیٹ کے نمائندگان و تجارتی تنظیموں سے مشاورت کا سلسلہ بھی جاری رکھا گیا ہے تاکہ تاجروں کی قیمتی آراء اور تجاویز کا بغور جائزہ لیا جا سکے، ایف بی آر نے ہدایت کی ہے کہ اگر رجسٹریشن کے دوران کسی بھی قسم کا تکنیکی مسئلہ پیش آئے تو تاجر براہِ راست ایف بی آر سے رابطہ کریں۔

ترجمان ایف بی آر کا کہنا ہے کہ یہ خصوصی ٹیکس اسکیم چھوٹے دکانداروں کو باضابطہ ٹیکس نظام کا حصہ بننے کا بہترین موقع فراہم کرتی ہے، اور اس اسکیم کا بنیادی مقصد رضاکارانہ ٹیکس تعمیل کی حوصلہ افزائی کرنا ہے۔ اس سے نہ صرف چھوٹے تاجروں کے لیے کاروباری امور میں آسانی پیدا ہوگی بلکہ انہیں ٹیکس کے معاملات میں زیادہ قانونی یقین دہانی بھی میسر آئے گی۔ ایف بی آر نے پختہ عزم ظاہر کیا ہے کہ تاجر برادری کے بھرپور تعاون سے یہ خصوصی ٹیکس اسکیم ایک انتہائی کامیاب اقدام ثابت ہوگی۔