حکومت، معیشت اور کرکٹ سے کوئی امید باقی نہیں رہی، فضیلہ قاضی

پاکستانی شوبز انڈسٹری کی سینئر اداکارہ فضیلہ قاضی نے کہا ہے کہ انہیں حکومت، معیشت اور کرکٹ سے کوئی خاص امید نہیں رہی۔ نجی ٹی وی کے ایک پروگرام کے دوران گفتگو کرتے ہوئے اداکارہ نے بتایا کہ آج کل لوگ اپنے زورِ بازو پر زندگی گزارنے پر مجبور ہیں کیونکہ بنیادی سہولیات بھی دستیاب نہیں ہیں۔

انہوں نے کہا کہ جس شخص کے بچوں کو کھانا نہیں مل رہا، وہ سب سے پہلے اپنے بچوں کا پیٹ بھرنے کے بارے میں سوچے گا، ایسے میں وہ اپنے حقوق کے لیے آواز کیسے اٹھائے گا۔ فضیلہ قاضی نے مزید کہا کہ عوام کو مسائل میں الجھا کر رکھا جاتا ہے تاکہ وہ اپنے حقوق کے لیے کھڑے نہ ہوں، کیونکہ اگر انہیں سہولیات فراہم کر دی جائیں تو وہ سوالات کرنا شروع کر دیں گے۔

اداکارہ نے اپنی مثال دیتے ہوئے بتایا کہ وہ ایک پوش علاقے میں رہتی ہیں، لیکن اس کے باوجود گیس اور پانی جیسی بنیادی سہولیات دستیاب نہیں۔ بارش کے بعد سے گیس غائب ہے جبکہ پانی ٹینکر کے ذریعے حاصل کرنا پڑتا ہے اور بجلی کے بھاری بل الگ سے آتے ہیں۔

فضیلہ قاضی نے کہا کہ پہلے گیس دستیاب ہوتی تھی اور بل بھی کم آتے تھے، مگر اب صورتحال اس کے برعکس ہے، بل زیادہ ہیں لیکن سہولت نہیں۔ انہوں نے بتایا کہ اب وہ اپنی امیدیں صرف اللہ پر رکھتی ہیں اور شکر ادا کرتی ہیں کہ سانس اور رزق کا اختیار اللہ کے پاس ہے۔