قومی اسمبلی سے انتخابی اصلاحاتی کمیٹی منظور، نوٹیفکیشن جلد جاری ہو گا: طارق فضل

وفاقی وزیر برائے پارلیمانی امور ڈاکٹر طارق فضل چودھری نے کہا ہے کہ قومی اسمبلی سے الیکشن ریفارمز کمیٹی کی تشکیل کی منظوری دی جا چکی ہے، اور اسپیکر قومی اسمبلی کی جانب سے جلد اس کمیٹی کے قیام کا باضابطہ نوٹیفکیشن جاری کر دیا جائے گا۔

ڈاکٹر طارق فضل چودھری کا کہنا ہے کہ کمیٹی کے اراکین کے ناموں کو حتمی شکل دینے کا عمل ابھی باقی ہے، جبکہ قومی اسمبلی میں جب اس حوالے سے موشن پیش کی گئی تو تحریک انصاف نے اس کی مخالفت نہیں کی۔ انہوں نے تفصیلات بتاتے ہوئے کہا کہ مجوزہ کمیٹی 30 ارکان پر مشتمل ہوگی جس میں قومی اسمبلی سے 20 جبکہ سینیٹ سے 10 اراکین شامل ہوں گے۔ کمیٹی میں نشستوں کی تقسیم ایوان میں موجود سیاسی جماعتوں کے عددی تناسب کے تحت کی جائے گی، اور اس کا بنیادی مقصد انتخابی نظام میں بہتری، شفافیت اور اصلاحات کے لیے پارلیمانی سطح پر مؤثر مشاورت اور اتفاقِ رائے کو فروغ دینا ہے۔

وفاقی وزیر نے اس عزم کا اظہار کیا کہ ہماری بھرپور کوشش ہوگی کہ انتخابی اصلاحات کے اس عمل میں اپوزیشن سمیت تمام پارلیمانی جماعتوں کی مثبت، تعمیری اور قابلِ عمل تجاویز کو اہمیت دی جائے تاکہ ایک ایسا شفاف انتخابی نظام تشکیل دیا جا سکے جو عوام کے اعتماد اور جمہوری اقدار کو مزید مستحکم بنائے۔ انہوں نے مزید کہا کہ انتخابی اصلاحات کسی ایک جماعت کا نہیں بلکہ پورے جمہوری نظام کو مضبوط کرنے کا ایک مشترکہ قومی معاملہ ہے، اس لیے تمام سیاسی جماعتوں کو باہمی مشاورت سے قومی مفاد کو مقدم رکھنا چاہیے۔