الیکشن کمیشن کا ایم کیو ایم کو مزید مہلت دینے سے انکار: “پاکستان میں کون سی جنگ ہو رہی ہے؟” چیف الیکشن کمشنر کے سخت ریمارکس

الیکشن کمیشن آف پاکستان نے ایم کیو ایم پاکستان کی جانب سے انٹرا پارٹی انتخابات کے لیے دو ماہ کی مزید مہلت مانگنے کی درخواست مسترد کر دی ہے۔ کیس کی سماعت کے دوران ڈی جی پولیٹیکل فنانس نے بتایا کہ ایم کیو ایم کے اپنے آئین کے مطابق انتخابات اکتوبر 2025 میں ہونے تھے، جس کے لیے کمیشن نے پہلے ہی 16 جنوری اور پھر 16 مارچ 2026 تک کی رعایت دی تھی، تاہم پارٹی نے انتخابات کرانے کے بجائے قرارداد کے ذریعے تنظیم کو توسیع دے دی۔ سماعت کے دوران ایم کیو ایم کے نمائندے نے مؤقف اختیار کیا کہ کنوینر خالد مقبول صدیقی “جنگ کی صورتحال” اور وزارتی امور میں مصروف ہیں، جس پر چیف الیکشن کمشنر نے سخت برہمی کا اظہار کرتے ہوئے ریمارکس دیے کہ “پاکستان میں کون سی جنگ ہو رہی ہے؟ ہم مزید وقت نہیں دے سکتے”۔ چیف الیکشن کمشنر نے متنبہ کیا کہ خالد مقبول صدیقی یا ان کے وکیل اگلی سماعت پر پیش ہوں، کہیں ایسا نہ ہو کہ یہاں سے کیس فارغ ہو تو وہاں سے پارٹی عہدہ بھی فارغ ہو جائے۔ الیکشن کمیشن نے کیس کی مزید سماعت 16 اپریل تک ملتوی کر دی ہے۔