ایران کے ساتھ جنگ بندی ختم ہو چکی، وقت ضائع نہیں کرنا چاہتا، اب ہمیں اپنا کام کرنا ہوگا: ٹرمپ

امریکی صدر ڈونلڈ ٹرمپ نے ایران کے ساتھ جنگ بندی ختم ہونے کا باقاعدہ اعلان کرتے ہوئے کہا ہے کہ تہران کے ساتھ مزید معاملات کرنا محض وقت کا ضیاع ہے اور اب امریکہ کو اپنا کام کرنا ہوگا۔ ترکیے کے دارالحکومت انقرہ میں نیٹو چیف جنرل مارک روٹے کے ہمراہ پریس کانفرنس کرتے ہوئے امریکی صدر نے واضح کیا کہ ایران کو کسی بھی صورت جوہری ہتھیار بنانے کی اجازت نہیں دی جائے گی۔ انہوں نے نیٹو اتحادیوں پر کڑی تنقید کرتے ہوئے کہا کہ وہ نیٹو سے خوش نہیں ہیں کیونکہ تنظیم نے ایران کے خلاف امریکی مدد نہیں کی، جبکہ امریکہ نیٹو کو 100 فیصد فنڈنگ دے رہا ہے اور کچھ ممالک اپنا حصہ بھی نہیں ڈال رہے۔ صدر ٹرمپ نے انکشاف کیا کہ گزشتہ روز ایران نے سعودی عرب اور دیگر ممالک کے بحری جہازوں پر حملے کیے، جس کے جواب میں امریکی فوج نے بھرپور کارروائی کرتے ہوئے ایران کی تمام اعلیٰ قیادت کو ختم کر دیا ہے اور اب وہاں نئے لوگ موجود ہیں۔ اس کے علاوہ انہوں نے اسپین کو ایک انتہائی خراب شراکت دار قرار دیتے ہوئے اس کے ساتھ تجارت ختم کرنے کا بھی اعلان کیا۔