بھارت: الیکشن کمشنر کیخلاف احتجاج پر پولیس کا کریک ڈاؤن، اہم سیاسی رہنماؤں سمیت سیکڑوں مظاہرین زیر حراست

بھارتی دارالحکومت نئی دہلی میں سیکیورٹی فورسز نے چیف الیکشن کمشنر گیانیش کمار کے استعفے کا مطالبہ کرنے والے اپوزیشن اور نوجوانوں کے احتجاجی مظاہرے کو ناکام بنانے کے لیے بڑے پیمانے پر کریک ڈاؤن کرتے ہوئے ہزاروں مظاہرین سمیت ‘کاکروچ جنتا پارٹی’ (CJP) کے بانی اور اپوزیشن رہنماؤں کو حراست میں لے لیا ہے۔ انتظامیہ نے مظاہرین کو وسطی دہلی اور جنتر منتر تک پہنچنے سے روکنے کے لیے دارالحکومت کو مکمل طور پر سیل کر دیا، درجنوں میٹرو اسٹیشنز اور تجارتی مراکز بند کر دیے جبکہ انٹرنیٹ اور موبائل سروسز بھی معطل کر دیں۔ یہ احتجاج ووٹر لسٹوں کی حالیہ مرمت و ترامیم کے خلاف کیا جا رہا تھا، جس پر اپوزیشن کا الزام ہے کہ اس کے ذریعے حکمران جماعت بی جے پی کو غیر منصفانہ سیاسی فائدہ پہنچایا گیا ہے۔

دہلی پولیس نے طیارے سے اترتے ہی کاکروچ جنتا پارٹی کے بانی ابھیجیت دیپکے، سینئر رہنماؤں سورو داس اور آسوتوش رانکا کو فوری طور پر حراست میں لے لیا۔ حراست سے قبل اپنے پیغام میں دیپکے نے بتایا کہ ان کی غیر موجودگی میں اجنکیا شندے تحریک کی قیادت کریں گے۔ کریک ڈاؤن کے دوران آل انڈیا اسٹوڈنٹس ایسوسی ایشن (AISA) کی صدر نیہا بورا، سی پی آئی کے جنرل سیکرٹری دیپانکر بھٹاچاریہ، سینئر وکیل پرشانت بھوشن، معروف سیاستدان یوگیندر یادو، مغربی بنگال کی سابق وزیراعلیٰ ممتا بنرجی اور عام آدمی پارٹی کے رہنما اروند کیجریوال کو بھی حراست میں لے لیا گیا۔ دوسری جانب بی جے پی ترجمان سمبت پاترا نے مظاہرین کو ‘انتشار پسند’ قرار دیتے ہوئے اس احتجاج کو ایک ناکام شو اور ملک میں امن و امان کی صورتحال کو مکمل مستحکم قرار دیا۔