برآمدات میں کمی، درآمدات میں اضافہ: تجارتی خسارہ 19 ارب ڈالر سے تجاوز

پاکستان کا تجارتی توازن رواں مالی سال کے دوران شدید دباؤ کا شکار ہو گیا ہے، جہاں برآمدات میں نمایاں کمی جبکہ درآمدات میں اضافہ ریکارڈ کیا گیا ہے۔ ادارہ شماریات کے مطابق رواں مالی سال کے پہلے چھ ماہ میں تجارتی خسارہ 19 ارب ڈالر سے تجاوز کر گیا۔

ادارہ شماریات کی رپورٹ کے مطابق رواں مالی سال کی پہلی ششماہی میں برآمدات میں 8.7 فیصد کمی دیکھی گئی اور مجموعی برآمدات 15 ارب 18 کروڑ ڈالر سے زائد رہیں۔ اس کے مقابلے میں گزشتہ مالی سال کے اسی عرصے میں برآمدات کا حجم 16 ارب 63 کروڑ ڈالر سے زیادہ تھا۔

دوسری جانب چھ ماہ کے دوران درآمدات میں 11.28 فیصد اضافہ ریکارڈ کیا گیا، جو بڑھ کر 34 ارب 38 کروڑ ڈالر سے تجاوز کر گئیں، جبکہ گزشتہ مالی سال کی پہلی ششماہی میں درآمدات 30 ارب 90 کروڑ ڈالر تھیں۔

رپورٹ کے مطابق دسمبر 2025 میں گزشتہ سال کے دسمبر کے مقابلے برآمدات میں 20 فیصد کمی جبکہ اسی عرصے میں درآمدات میں 2 فیصد اضافہ ریکارڈ کیا گیا، جس سے ملکی تجارتی خسارے میں مزید اضافہ ہوا ہے۔