اسلام آباد کچہری دھماکے کی افغانستان میں منصوبہ بندی بے نقاب،سہولت کار کا اعتراف

اسلام آباد: وفاقی وزیر اطلاعات عطا اللہ تارڑ نے پریس کانفرنس میں بتایا کہ خودکش حملہ آور اصل ہدف تک نہ پہنچ سکا اور مضافاتی علاقے میں خود کو دھماکے سے اڑا لیا، جس سے بڑا جانی نقصان ہونے سے بچ گیا۔

وزیر اطلاعات کے مطابق حملے کے بعد 48 گھنٹوں میں 4 اہم ملزمان گرفتار کیے گئے، جن میں ساجد اللہ عرف شینا، کامران خان، محمد ذالی اور شاہ منیر شامل ہیں۔حکام کے مطابق ساجد اللہ حملے کا مرکزی کردار تھا، جو 2015 سے افغانستان میں ٹی ٹی پی سے وابستہ تھا اور مختلف ٹریننگ کیمپوں میں تربیت لیتا رہا۔

حملے کی منصوبہ بندی ٹی ٹی پی کے سربراہ نور ولی محسود نے اپنے کمانڈر داداللہ کے ذریعے کی۔ ملزمان نے خودکش حملہ آور عثمان شنواری کو بارودی جیکٹ اور مواد فراہم کیا، جسے بعد میں اسلام آباد کے جی-11 سیکٹر میں استعمال کیا گیا۔سرکاری حکام کا کہنا ہے کہ بروقت کارروائی سے ایک بڑے سانحے سے بچا گیا اور دہشت گرد نیٹ ورک بے نقاب ہو گیا۔