چالیس سال افغان بھائیوں کی خدمت کا اچھا صلہ نہیں ملا: سرفراز بگٹی

وزیراعلیٰ بلوچستان سرفراز بگٹی نے پشین میں پاکستان پیپلز پارٹی کے ایک بڑے جلسہ عام سے خطاب کرتے ہوئے پڑوسی ملک افغانستان اور خطے کی سیکیورٹی صورتحال پر دو ٹوک موقف اختیار کیا ہے۔ انہوں نے کہا کہ افغانستان ہمارا برادر ہمسایہ ملک ہے اور پاکستان نے گزشتہ 40 سال سے افغان بھائیوں کی بے لوث خدمت کی ہے، لیکن بدقسمتی سے اس بھائی چارے کا مناسب صلہ نہیں ملا۔وزیراعلیٰ نے افغان بھائیوں سے پرزور اپیل کی کہ وہ پاکستان میں جاری قتل و غارت اور بدامنی کا سلسلہ بند کریں۔ انہوں نے واضح کیا کہ آرمی چیف جنرل عاصم منیر کی موجودگی میں کسی کو بھی پاکستان کی سالمیت کو نقصان پہنچانے کی ہرگز اجازت نہیں دی جائے گی۔ سرفراز بگٹی نے ایران میں اسرائیل کی جانب سے حالیہ حملوں اور قتل عام کی بھی سخت الفاظ میں مذمت کی، تاہم انہوں نے دوہرایا کہ “ہمارے لیے سب سے پہلے پاکستان ہے”۔عوامی فلاح و بہبود کے حوالے سے گفتگو کرتے ہوئے وزیراعلیٰ نے پشین کو ڈویژن کا درجہ دینے پر خوشی کا اظہار کیا اور اسے علاقے کی ترقی کے لیے ایک سنگ میل قرار دیا۔ انہوں نے مزید کہا کہ بلوچستان کے غیور عوام صرف امن اور ترقی کے خواہاں ہیں۔ سرفراز بگٹی نے مخالفین کے شکوک و شبہات کو مسترد کرتے ہوئے عزم ظاہر کیا کہ وہ صوبے کے کونے کونے میں جا کر تعلیم، صحت اور امن و امان کی صورتحال بہتر بنانے کے لیے دن رات کام کریں گے۔