ہردیپ سنگھ نجر کے قتل میں بھارت ملوث تھا: کینیڈین وزیراعظم

کینیڈا کے وزیراعظم مارک کارنے نے تسلیم کیا ہے کہ کینیڈین شہری اور سکھ رہنما ہردیپ سنگھ نجر کے قتل کی تحقیقات میں بھارت کا ملوث ہونا سامنے آیا ہے، اور اس سلسلے میں کینیڈا نے بھارتی حکام سے تحقیقاتی تعاون بھی حاصل کیا ہے۔ نیویارک ٹائمز کو دیے گئے ایک انٹرویو میں کینیڈین وزیراعظم نے کہا کہ مستقبل میں اس نوعیت کے سنگین واقعات کی روک تھام کے لیے بین الاقوامی اور دوطرفہ سکیورٹی تعاون انتہائی لازمی ہے، تاہم انہوں نے واضح کیا کہ وہ اس بات کی مطلق ضمانت نہیں دے سکتے کہ کینیڈین سرزمین پر بھارت سے منسلک کوئی جرم دوبارہ نہیں ہو گا۔

واضح رہے کہ اس سے قبل کینیڈا کے سابق وزیراعظم جسٹن ٹروڈو نے سب سے پہلے انکشاف کیا تھا کہ بھارتی حکومت کے ایجنٹ کینیڈا میں ہردیپ سنگھ نجر کے قتل میں ملوث رہے ہیں، جس کے بعد بھارت اور کینیڈا کے درمیان شدید سفارتی اور سیاسی محاذ آرائی دیکھنے میں آئی تھی۔ مارک کارنے کی جانب سے وزیراعظم کا منصب سنبھالنے کے بعد ہردیپ سنگھ نجر کے قتل اور بھارتی مداخلت کے معاملے پر یہ پہلا باضابطہ اور اہم بیان سامنے آیا ہے۔