ٹیک آف کے دوران پہیہ نیچے گرنے کے باوجود طیارے کی بحفاظت لینڈنگ

ٹیک آف کے دوران برطانوی ایئرلائن کے طیارے کا پچھلا پہیہ نیچے گر گیا، تاہم خوش قسمتی سے کوئی جانی نقصان نہیں ہوا اور طیارہ بحفاظت لندن پہنچ گیا۔

غیر ملکی میڈیا رپورٹس کے مطابق یہ واقعہ پیر کے روز پیش آیا، جب طیارہ لندن جانے کے لیے نیواڈا ایئرپورٹ سے روانہ ہوا۔ طیارے نے رات 9 بجکر 10 منٹ پر اڑان بھری تھی کہ اسی دوران اس کا پچھلا پہیہ نیچے آ گرا۔

رپورٹ کے مطابق پہیہ گرنے کے باوجود پائلٹ نے پیشہ ورانہ مہارت کا مظاہرہ کرتے ہوئے پرواز جاری رکھی اور طیارہ مقررہ وقت سے 27 منٹ قبل بحفاظت لندن ایئرپورٹ پر لینڈ کر گیا۔

میڈیا کا کہنا ہے کہ طیارے کا پہیہ گرنے کی وجہ تاحال معلوم نہیں ہو سکی، جبکہ متعلقہ حکام نے واقعے کی تحقیقات شروع کر دی ہیں۔