بلاول بھٹو زرداری کی برطانوی وزیر ہیمش فالکن سے ملاقات، خطے میں امن کے لیے پاکستان کے سفارتی کردار پر گفتگو

پاکستان پیپلز پارٹی کے چیئرمین بلاول بھٹو زرداری نے اسلام آباد میں واقع برطانوی ہائی کمیشن کا دورہ کیا، جہاں انہوں نے برطانوی وزیر برائے مشرقِ وسطیٰ، شمالی افریقہ، افغانستان و پاکستان اور لیبر پارٹی کے رکنِ پارلیمان ہمیش فالکن سے ایک اہم اور اعلیٰ سطحی ملاقات کی۔ اس اہم سفارتی بیٹھک میں برطانوی ہائی کمشنر جین میریٹ، پولیٹیکل کونسلر نکول رابرٹس اور فرسٹ سیکریٹری پولیٹیکل شارلٹ اوجیناکا بھی ہمیش فالکن کے ہمراہ موجود تھیں۔ ملاقات کے دوران پاکستان اور برطانیہ کے درمیان دیرینہ دوطرفہ تعلقات کو مزید مستحکم بنانے، تجارتی روابط کو وسعت دینے اور باہمی معاشی تعاون کو نئی بلندیوں پر لے جانے کے حوالے سے تفصیلی اور مثبت گفتگو کی گئی، جس میں دونوں رہنماؤں نے پاک برطانیہ اقتصادی شراکت داری میں مزید اضافے پر مکمل اتفاق کیا۔

ملاقات کے دوران علاقائی سلامتی کی صورتحال اور بین الاقوامی سیاسی منظرنامے پر بھی تبادلہ خیال کیا گیا، جہاں برطانوی وزیر ہمیش فالکن نے خطے میں پائیدار امن و استحکام کے قیام اور تنازعات کے حل کے لیے پاکستان کے مثبت اور متحرک سفارتی کردار کو شاندار الفاظ میں سراہا۔ چیئرمین بلاول بھٹو زرداری اور برطانوی وفد نے پاک برطانیہ عوامی اور سفارتی تعلقات کو مزید مضبوط بنانے کے عزم کا اعادہ کیا اور اس بات پر زور دیا کہ دونوں ممالک کے مابین مختلف شعبوں میں تعاون کو بڑھا کر علاقائی چیلنجز سے مؤثر انداز میں نمٹا جا سکتا ہے۔