راولاکوٹ میں اغوا ہونے والا جج بازیاب، پولیس اہلکار سمیت دو افراد زخمی

آزاد کشمیر کے علاقے راولاکوٹ میں پولیس نے ایک کامیاب کارروائی کے بعد ایڈیشنل ڈسٹرکٹ اینڈ سیشن جج محمد اکرم کو بازیاب کرا لیا ہے، جنہیں مبینہ طور پر کالعدم تنظیم کے کارکنوں نے اغوا کر لیا تھا۔

راولاکوٹ پولیس کے ذمہ دار حکام کے مطابق، ایڈیشنل ڈسٹرکٹ اینڈ سیشن جج محمد اکرم راولاکوٹ سے پلندری کے راستے دارالحکومت مظفر آباد جا رہے تھے کہ راستے میں کالعدم جموں کشمیر جوائنٹ عوامی ایکشن کمیٹی کے مشتعل کارکنوں نے مبینہ طور پر انہیں ان کی گاڑی سمیت اسلحے کے زور پر اغوا کر لیا۔ پولیس کے مطابق اس دوران گاڑی میں جج صاحب کا ڈرائیور اور ان کا گن مین بھی موجود تھے۔

پولیس ذرائع نے بتایا کہ بدھ اور جمعرات کی درمیانی شب ایک مربوط ریسکیو و سرچ آپریشن کے دوران جج کو بحفاظت بازیاب کرا لیا گیا۔ پولیس کی جانب سے جاری کردہ بیان میں یہ بھی انکشاف کیا گیا ہے کہ اس کارروائی کے دوران جوائنٹ عوامی ایکشن کمیٹی کے کارکنوں نے ایک اسپتال کے باہر پولیس پر فائرنگ کی، جس کے نتیجے میں ایک پولیس اہلکار سمیت دو افراد زخمی ہو گئے۔ پولیس نے واقعے کی مزید تفتیش شروع کر دی ہے اور ملوث افراد کے خلاف قانون کے مطابق کارروائی عمل میں لائی جا رہی ہے۔