ملک کیخلاف پروپیگنڈا ناقابل برداشت، ایسی حرکتیں کرنے والوں کو شرم آنی چاہیے: عطاء تارڑ

اسلام آباد: وفاقی وزیرِ اطلاعات و نشریات عطاء اللہ تارڑ نے دو ٹوک الفاظ میں واضح کیا ہے کہ موجودہ عالمی صورتحال میں پاکستان کے خلاف کسی بھی قسم کا پروپیگنڈا برداشت نہیں کیا جائے گا۔ اسلام آباد میں پریس کانفرنس کرتے ہوئے انہوں نے کہا کہ جو لوگ سیاسی مفادات کے لیے ملک کے وقار کو داؤ پر لگا رہے ہیں، انہیں شرم آنی چاہیے۔

وزیرِ اطلاعات نے مشرقِ وسطیٰ کی صورتحال میں پاکستان کے ابھرتے ہوئے کلیدی کردار پر روشنی ڈالتے ہوئے کہا کہ عالمی برادری پاکستان کی سفارتی کوششوں کا لوہا مان رہی ہے۔ انہوں نے وزیراعظم شہباز شریف اور فیلڈ مارشل سید عاصم منیر کی قیادت میں سفارتی محاذ پر حاصل ہونے والی کامیابیوں کا ذکر کیا اور کہا کہ ہمسایہ ملک بھارت پاکستان کی ان کامیابیوں سے بوکھلاہٹ کا شکار ہے۔

عطاء اللہ تارڑ کا کہنا تھا کہ تنقید سب کا حق ہے لیکن کوئی بھی سیاسی لیڈر یا شخصیت ملک سے مقدم نہیں ہو سکتی۔ انہوں نے جنیوا اجلاس کا حوالہ دیتے ہوئے کہا کہ پاکستان ایک مؤثر آواز بن کر سامنے آیا ہے۔ ان کا مزید کہنا تھا کہ شخصیت پرستی اور انا پرستی ملک کے لیے نقصان دہ ہے، اور قومی مفاد پر کسی قسم کا سمجھوتہ نہیں کیا جائے گا۔