غیر قانونی بھرتیاں: اسعد محمود کو نیب اور ایف آئی اے کے نوٹسز جاری

سابق وفاقی وزیر اسعد محمود کے خلاف پاکستان پوسٹ آفس میں ہزاروں مبینہ غیر قانونی اور قواعد و ضوابط کے برعکس بھرتیوں کا بڑا اسکینڈل سامنے آ گیا ہے، جس پر قومی احتساب بیورو (نیب) اور وفاقی تحقیقاتی ادارے (ایف آئی اے) نے انہیں باضابطہ طلبی کے نوٹسز جاری کر دیے ہیں۔

نیب راولپنڈی کی جانب سے جاری کردہ نوٹس کے مطابق اسعد محمود کو 10 نومبر 2026ء کو تحقیقاتی ٹیم کے سامنے پیش ہونے کی ہدایت کی گئی ہے۔ تحقیقاتی دستاویزات کے مطابق اسعد محمود کے دورِ وزارت (2022ء تا 2023ء) کے دوران اسٹیبلشمنٹ ڈویژن نے پاکستان پوسٹ آفس میں 3 ہزار 938 آسامیوں پر بھرتیوں کی منظوری دی تھی، مگر مبینہ طور پر 4 ہزار 252 افراد کو خلافِ قانون بھرتی کیا گیا۔ نیب نوٹس میں انکشاف کیا گیا ہے کہ اس دوران 2 ہزار 646 ایسی آسامیوں پر بھی تقرریاں کی گئیں جنہیں پہلے ہی ختم کیا جا چکا تھا، جبکہ کابینہ کمیٹی کے احکامات اور ٹیسٹنگ ایجنسی کی سفارشات کو ہوا میں اڑاتے ہوئے کنٹریکٹ کی بجائے مستقل تقرریاں کی گئیں۔ ان بھرتیوں میں ڈومیسائل کوٹے کی خلاف ورزی، زائد العمر امیدواروں، جعلی دستاویزات اور مبینہ سیاسی وابستگی کے الزامات شامل ہیں۔

دوسری جانب، ایف آئی اے کے اینٹی کرپشن سرکل اسلام آباد نے بھی انکوائری نمبر 197/2026 کے تحت کارروائی کرتے ہوئے اسعد محمود کو بیان ریکارڈ کرانے کے لیے طلب کر رکھا ہے۔ نیب نے نوٹس میں انتباہ جاری کیا ہے کہ عدم تعمیل یا پیش نہ ہونے کی صورت میں قومی احتساب آرڈیننس 1999ء کی دفعہ 31 کے تحت سخت قانونی کارروائی عمل میں لائی جائے گی۔