خیبرپختونخوا:گرفتار افغان دہشتگرد کا خودکش حملہ آور تیار کرنے کا اعتراف

سکیورٹی فورسز اور پولیس کی مشترکہ انٹیلیجنس بیسڈ کارروائی میں گرفتار ہونے والے افغان دہشت گرد نے خودکش حملہ آور تیار کرنے سمیت دہشت گردی کے نیٹ ورک سے متعلق کئی ہوشربا اعترافات کیے ہیں۔

مشیر اطلاعات محمود جان بابر اور ایڈیشنل آئی جی عباس احسن نے مشترکہ پریس کانفرنس کرتے ہوئے بتایا کہ افغانستان کی سرزمین پاکستان میں دہشت گردی کے لیے استعمال ہو رہی ہے۔ انہوں نے کہا کہ دہشت گرد رات کی تاریکی کا فائدہ اٹھا کر دراندازی کی کوشش کرتے ہیں، تاہم سکیورٹی فورسز ان کے خلاف بھرپور اور مؤثر کارروائیاں جاری رکھے ہوئے ہیں۔

ایڈیشنل آئی جی عباس احسن نے تفصیلات بتاتے ہوئے کہا کہ گرفتار ہونے والے خارجی دہشت گرد کی شناخت حکمت اللہ عرف حمزہ ولد نور محمد کے نام سے ہوئی ہے، جس کا تعلق افغان صوبہ پکتیا سے ہے۔ انہوں نے انکشاف کیا کہ ملزم نے افغان آرمی میں کمانڈو ٹریننگ حاصل کر رکھی ہے، وہ خارجی کمانڈر منصور کے سکیورٹی گارڈ کے طور پر بھی کام کرتا رہا اور اس نے ایک خودکش حملہ آور کو بھی تیار کیا۔

پریس کانفرنس کے دوران گرفتار دہشت گرد کا اعترافی ویڈیو بیان بھی میڈیا کے سامنے پیش کیا گیا۔ اپنے بیان میں دہشت گرد حکمت اللہ نے اعتراف کیا کہ اس نے جلال آباد میں ‘اکرمہ’ نامی شخص سے ملاقات کے بعد اسے خودکش حملے کے لیے تیار کیا تھا۔ ملزم نے یہ بھی واضح کیا کہ حراست کے دوران پاکستانی حکام کی جانب سے اس کے ساتھ اچھا اور انسانی سلوک کیا جا رہا ہے۔