امریکا کا ایران میں 2 ہزار اہداف اور بحری اثاثے تباہ کرنے کا دعویٰ

امریکی سینٹرل کمانڈ نے اعلان کیا ہے کہ ایران کے اندر وسیع پیمانے پر فوجی کارروائیاں کی گئی ہیں جن میں تقریباً دو ہزار اہداف کو نشانہ بنایا گیا۔ حکام کے مطابق ان حملوں میں سترہ ایرانی بحری جہاز، جن میں ایک آبدوز بھی شامل ہے، تباہ کیے گئے۔

سینٹکام کا کہنا ہے کہ خلیج عرب، آبنائے ہرمز اور خلیج عمان میں ایرانی بحری موجودگی ختم ہو چکی ہے۔ دوسری جانب ایران نے امریکی حملوں کے جواب میں پانچ سو بیلسٹک میزائل اور دو ہزار سے زائد ڈرون فائر کرنے کا دعویٰ کیا ہے۔

امریکی صدر ڈونلڈ ٹرمپ نے اپنے بیان میں کہا کہ ایران کی عسکری صلاحیت کو شدید نقصان پہنچایا گیا ہے اور ایران اگر مذاکرات چاہتا ہے تو اب بہت دیر ہو چکی ہے۔ ان کے مطابق اہداف کے مکمل حصول تک کارروائی جاری رہے گی۔

ادھر امریکی وزیر خارجہ مارکو روبیو نے کہا ہے کہ ایران کے میزائل لانچنگ مقامات اور جوہری تنصیبات کو نشانہ بنایا جا رہا ہے اور ایران کو جوہری ہتھیار حاصل کرنے کی اجازت نہیں دی جائے گی۔