پی ٹی آئی نے خیبرپختونخوا میں امن و امان کیلئے کچھ نہیں کیا: امیر مقام

وفاقی وزیر امیر مقام نے پشاور میں میڈیا سے گفتگو کرتے ہوئے شدید تنقید کرتے ہوئے کہا ہے کہ خیبر پختونخوا میں پاکستان تحریک انصاف (پی ٹی آئی) کے 13 سالہ اقتدار کے دعوے سراسر جھوٹ پر مبنی تھے، اور یہ گزشتہ 13 سال صوبے کی تاریخ کا انتہائی تاریک دور ثابت ہوئے ہیں جہاں سابق حکومت نے امن و امان کے قیام کے لیے عملی طور پر کچھ نہیں کیا۔

امیر مقام کا کہنا تھا کہ خیبر پختونخوا میں صحت اور تعلیم سمیت زندگی کے کسی بھی شعبے میں بہتری یا کوئی عملی کام نظر نہیں آ رہا۔ انہوں نے الزام عائد کیا کہ گزشتہ حکومت نے خود بھی کرپشن کی اور دوسروں کو بھی اس کی دعوت دی، اب عوام کے پیسوں اور ان کی پائی پائی کا حساب دینا ہوگا کیونکہ روزانہ نئے نئے اسکینڈلز سامنے آ رہے ہیں، اور لوٹ مار کرنے والوں کو عدالتوں سے بھی کوئی ریلیف نہیں ملے گا۔

انہوں نے مزید کہا کہ خیبر پختونخوا کو نو گو ایریا بنایا جا رہا ہے، تاہم صوبے کے عوام نے ہر مشکل وقت میں پاکستان کا بھرپور ساتھ دیا ہے۔ ان کا کہنا تھا کہ پی ٹی آئی کو ووٹ دینے والے بھی محب وطن پاکستانی ہیں لیکن ایک مخصوص ٹولہ محب وطن عوام کو گمراہ کر رہا تھا اور پی ٹی آئی حکومت کا اصل ہدف معاشرے میں نفرتیں بڑھانا تھا۔ وفاقی وزیر نے پاک فوج کو خراج تحسین پیش کرتے ہوئے کہا کہ فوج کے جوان ہر محاذ پر اپنا کردار ادا کر رہے ہیں، اور یہاں تک کہ دنیا میں لگی آگ بجھانے میں بھی پاکستانی فوج کا نمایاں کردار رہا ہے۔

امیر مقام کا کہنا تھا کہ ہماری ہمیشہ سے یہی خواہش تھی کہ دیے گئے مینڈیٹ کے مطابق صوبے کی ترقی کے لیے کام کیا جاتا، تاہم وفاقی حکومت کو ملکی معیشت کی بہتری کے لیے سخت فیصلے کرنا پڑے۔ انہوں نے طنز کرتے ہوئے کہا کہ سیاسی لانگ مارچ الٹی سمت سے شروع کیا گیا تھا جبکہ صوبے کے وزیراعلیٰ عوام کو چھوڑ کر کبھی کراچی اور کبھی لاہور میں مصروف نظر آتے ہیں۔ انہوں نے دعویٰ کیا کہ خیبر پختونخوا کے عوام نے 11 اکتوبر کو باقاعدہ جشن منایا اور وہ یہی کہہ رہے ہیں کہ اچھا ہوا کہ اس حکومت سے نجات مل گئی۔

انہوں نے اپنے اوپر ماضی کے مقدمات کا حوالہ دیتے ہوئے کہا کہ انہوں نے عمران خان کے دورِ حکومت میں تمام اداروں کا سامنا کیا اور اپنی بے گناہی ثابت کی۔ آج خیبر پختونخوا کے عوام پنجاب جیسی سہولیات اور ترقی کا مطالبہ کر رہے ہیں، اور صوبے میں حقیقی امن و ترقی کے لیے سب کو مل کر کام کرنا ہوگا۔ آخر میں اقلیتی برادری سے متعلق گفتگو کرتے ہوئے امیر مقام نے کہا کہ پاکستان کے قیام میں اقلیتی برادری کی بھی تاریخی اور بڑی قربانیاں شامل ہیں، اور انہیں عزت و احترام دینا ہم سب کی ملی ذمہ داری ہے۔ انہوں نے اس عزم کا اعادہ کیا کہ پاکستان پر جتنا حق ہمارا ہے اتنا ہی اقلیتی برادری کا بھی ہے، اور ان کے تمام مسائل ترجیحی بنیادوں پر حل کیے جائیں گے