“ہم یہاں صرف بھائی سے ملاقات کے لیے آئے ہیں”، کے پی قانون سازی اور احتجاج پر علیمہ خان کا میڈیا سے گفتگو میں جواب

بانی تحریک انصاف عمران خان کی ہمشیرہ علیمہ خان نے کہا ہے کہ وہ اس وقت اڈیالہ جیل کے باہر شدید گرمی میں صرف اپنے بھائی سے ملاقات کے لیے آئی ہیں اور ان کی توجہ کا مرکز صرف یہی معاملہ ہے۔

جیل کے باہر میڈیا سے گفتگو کرتے ہوئے جب علیمہ خان سے خیبر پختونخوا (کے پی) میں ہونے والی حالیہ قانون سازی سے متعلق سوال کیا گیا تو انہوں نے جواب دیا: “ہمیں بالکل نہیں پتہ کہ کے پی میں آپ کون سی قانون سازی کی بات کر رہے ہیں۔ ہم جیل کے باہر گرمی میں کھڑے ہیں اور بھائی سے ملاقات کے لیے آئے ہیں، آپ ہمیں اسی بات پر رکھیں۔ اس وقت ہمیں (سیاسی امور میں) کیا انٹرسٹ ہے۔”

کشمیر کے معاملے اور پاکستان تحریک انصاف (پی ٹی آئی) پر دباؤ کے حوالے سے بات کرتے ہوئے علیمہ خان نے واضح کیا کہ پی ٹی آئی ایک آزاد پارٹی ہے اور وہ اپنے فیصلے خود کر سکتی ہے، ان پر کسی کا دباؤ نہیں ہو سکتا۔ انہوں نے کشمیر کی صورتحال پر تشویش کا اظہار کرتے ہوئے کہا کہ اس وقت کشمیر میں جو ظلم ہو رہا ہے، پاکستان کا ہر شہری اس کے خلاف کشمیریوں کے ساتھ کھڑا ہے۔ انہوں نے کہا کہ کشمیریوں کا کھانا پینا بند کر کے وہاں کربلا جیسی صورتحال بنانے کی کوشش کی جا رہی ہے، ان پر ظلم نہیں ہونا چاہیے، وہ ہمارے بھائی ہیں۔

علیمہ خان نے مزید کہا کہ کشمیری ماشاءاللہ مضبوطی سے کھڑے ہیں اور ظلم کے خلاف احتجاج کرنا ان کا حق ہے، پورا پاکستان کشمیریوں کے نقشِ قدم پر چلے گا اور ان سے سیکھے گا۔ جب ان سے 5 اگست کو متوقع احتجاج کے بارے میں پوچھا گیا تو انہوں نے کہا کہ احتجاج کا سوال پارٹی سے پوچھا جائے، بانی پی ٹی آئی جماعت کے لیڈر ہیں اور ان کے لیے احتجاج جماعت ہی کرے گی۔ انہوں نے اس تاثر کو بھی رد کیا کہ پی ٹی آئی صرف سوشل میڈیا کی جماعت ہے، ان کا کہنا تھا کہ ہر چیز کا ایک وقت ہوتا ہے اور وقت آنے پر سب نظر آ جائے گا۔ اس موقع پر موجود بانی پی ٹی آئی کی دوسری ہمشیرہ ڈاکٹر عظمیٰ نے کہا کہ پہلے یہ نوٹ کیا جائے کہ وہ ملاقات کے لیے بالکل وقت پر پہنچ گئی ہیں