عام انتخابات27 جولائی کو شیڈول کے مطابق ہوں گے، الیکشن کمیشن آزاد جموں وکشمیر

آزاد جموں و کشمیر الیکشن کمیشن نے عام انتخابات کے التوا سے متعلق گردش کرنے والی خبروں اور قیاس آرائیوں کو مسترد کرتے ہوئے واضح کیا ہے کہ انتخابات 27 جولائی کو طے شدہ شیڈول کے مطابق منعقد ہوں گے۔

ترجمان الیکشن کمیشن کے مطابق قانون اور آئین کے تقاضوں کو مدنظر رکھتے ہوئے 5 جون کو انتخابی شیڈول جاری کیا گیا تھا، اس لیے انتخابات میں تاخیر یا التوا سے متعلق تمام دعوے بے بنیاد ہیں۔

ترجمان کا کہنا تھا کہ انتخابی شیڈول مکمل طور پر آئینی اور قانونی تقاضوں کے مطابق جاری کیا گیا اور اس کے پیچھے کسی قسم کا سیاسی مقصد کارفرما نہیں۔ انہوں نے کہا کہ بروقت انتخابات کا انعقاد الیکشن کمیشن کی آئینی ذمہ داری ہے۔

الیکشن کمیشن کے مطابق بعض حلقوں کی جانب سے انتخابی شیڈول کے حوالے سے بدنیتی پر مبنی تاثر دیا جا رہا ہے، جس میں کوئی صداقت نہیں۔

ترجمان نے اس عزم کا اظہار کیا کہ آزاد جموں و کشمیر میں شفاف، آزادانہ اور غیر جانبدار انتخابات کے انعقاد کو ہر صورت یقینی بنایا جائے گا تاکہ عوام اپنی رائے کا آزادانہ اظہار کر سکیں۔