بابر، شاہین اور شاداب کا وقت گزر چکا، نئے لڑکوں کو موقع دیا جائے، سابق کرکٹرز کا مطالبہ

پاکستان کرکٹ ٹیم کے سابق کپتان شاہد آفریدی اور محمد یوسف نے ٹی ٹوئنٹی ورلڈکپ میں بھارت کے ہاتھوں پاکستان کی 61 رنز سے شکست کے بعد کھلاڑیوں کی کارکردگی پر سخت تحفظات کا اظہار کیا ہے۔

میچ میں بھارت نے مقررہ 20 اوورز میں 7 وکٹ کے نقصان پر 175 رنز بنائے جبکہ پاکستان 18 اوور میں 114 رنز بنا کر آؤٹ ہوگئی۔ شاہد آفریدی نے نجی ٹی وی سے گفتگو کرتے ہوئے کہا کہ بھارت کے خلاف میچ میں کئی غلطیاں ہوئیں اور کپتان سلمان علی آغا کے فیصلے سمجھ سے باہر تھے۔ انہوں نے کہا کہ اگر ان کے ہاتھ میں فیصلہ ہوتا تو شاہین آفریدی، شاداب خان اور بابر اعظم کو ٹیم سے باہر بٹھا کر نئے کھلاڑیوں کو موقع دیتے۔

سابق کپتان نے زور دیا کہ کمزور ٹیموں کے خلاف بے معنی فتوحات سے کوئی فائدہ نہیں، اور نمیبیا کے خلاف میچ میں نئی نسل کے کھلاڑیوں کو آزمانا ضروری ہے۔

اسی طرح محمد یوسف نے بھی کہا کہ شاہین آفریدی، بابر اعظم اور شاداب خان کا وقت گزر چکا ہے اور ٹی ٹوئنٹی ٹیم کو نئے پرفارمرز کی ضرورت ہے۔ انہوں نے نشاندہی کی کہ کمزور ٹیموں کے خلاف بے معنی فتوحات ٹیم کی بہتری کے لیے مددگار نہیں ہیں۔

میچ میں شاداب خان نے ایک اوور میں 17 رنز دیے، شاہین آفریدی نے دو اوورز میں 31 رنز دے کر ایک وکٹ حاصل کی جبکہ بابر اعظم صرف 5 رنز بنا سکے۔ سابق کپتانوں نے دونوں کھلاڑیوں کی کارکردگی پر تشویش کا اظہار کرتے ہوئے نئی نسل کو موقع دینے پر زور دیا تاکہ ٹیم مستقبل میں مضبوط اور مقابلہ جاتی بن سکے۔