ایران کی جوہری عدم پھیلاؤ سے متعلق ذمہ داریوں کی خلاف ورزی، معاملہ سلامتی کونسل میں جائے گا

انٹرنیشنل اٹامک انرجی ایجنسی (IAEA) کے بورڈ آف گورنرز نے 20 برس میں پہلی بار ایران کی جانب سے جوہری عدم پھیلاؤ (NPT) سے متعلق بین الاقوامی ذمہ داریوں کی خلاف ورزی پر معاملہ اقوامِ متحدہ کی سلامتی کونسل کو بھیجنے کی تاریخی قرارداد منظور کر لی ہے۔ یہ قرارداد گزشتہ سال 12 جون کو منظور کردہ اس فیصلے تسلسل ہے جس میں ایران کو ایجنسی کی پاسداری میں ’عدم تعمیل‘ (Non-Compliance) کا مرتکب قرار دیا گیا تھا۔ ایران کا کیس سلامتی کونسل میں باضابطہ بھیجنے کے لیے اس تادیبی قرارداد کا منظور ہونا آئینی اور قانونی طور پر ضروری تھا۔

امریکہ، برطانیہ، فرانس اور جرمنی کی جانب سے مشترکہ طور پر پیش کی گئی اس قرارداد کے حق میں 23 ووٹ پڑے، جبکہ روس، چین اور نائیجر نے اس کی شدید مخالفت کی اور 8 ارکان نے رائے شماری کے عمل سے خود کو دور رکھا۔ یہ عدم تعمیل ایران کی جانب سے ان غیر اعلانیہ سائٹس پر پائے جانے والے یورینیم کے ذرات سے متعلق ہے جس کی ایجنسی ایک طویل عرصے سے تحقیقات کر رہی تھی۔ اس کے علاوہ، اسرائیل اور امریکہ کی جانب سے حالیہ بمباری کا نشانہ بننے والی ایرانی جوہری تنصیبات اور سائٹس تک آئی اے ای اے کے انسپکٹرز کی عدم رسائی نے تہران اور عالمی ایٹمی ادارے کے درمیان کشیدگی میں مزید اضافہ کر دیا ہے۔