ایران کے خلاف فوجی راستہ مکمل ناکام، عزت دیں، عزت لیں: عباس عراقچی

ایرانی وزیر خارجہ عباس عراقچی نے امریکہ اور اسرائیل کی جانب سے حالیہ دھمکیوں کو مسترد کرتے ہوئے واضح کیا ہے کہ ایران کے خلاف کوئی بھی فوجی حل کارگر ثابت نہیں ہوگا اور طاقت کا استعمال مکمل طور پر ناکامی سے دوچار ہوگا۔ ایرانی میڈیا سے گفتگو کرتے ہوئے انہوں نے کہا کہ ایران ایسی دھمکیوں کا عادی ہے اور کسی بھی قسم کے دباؤ کے سامنے سرِ تسلیم خم نہیں کرے گا۔

 عباس عراقچی نے زور دے کر کہا کہ امریکہ خود بھی اس حقیقت سے واقف ہے کہ جنگ یا دھمکیوں کے ذریعے مطلوبہ نتائج حاصل نہیں کیے جا سکتے۔ انہوں نے کہا، “اگر ایران سے عزت و احترام سے بات کی جائے گی تو ایران بھی اسی انداز میں جواب دے گا، لیکن ہم اپنی آزادی پر کوئی سمجھوتہ نہیں کریں گے۔” انہوں نے مزید خبردار کیا کہ اگرچہ ایران جنگ نہیں چاہتا، لیکن اگر اس پر حملہ ہوا تو اس کا جواب “بھرپور اور تباہ کن” ہوگا۔ برکس (BRICS) ممالک کے اجلاس کے دوران ایرانی وزیر خارجہ نے عالمی برادری اور خاص طور پر رکن ممالک سے مطالبہ کیا کہ وہ ایران پر امریکی اور اسرائیلی حملوں کی کھل کر مذمت کریں۔ انہوں نے امریکی پالیسیوں کو “غنڈہ گردی” قرار دیتے ہوئے کہا کہ اب اسے تاریخ کے کوڑے دان میں پھینکنے کا وقت آ گیا ہے۔ عباس عراقچی نے تنقید کرتے ہوئے کہا کہ مغرب کی خاموشی نے اسرائیل اور امریکہ کو بین الاقوامی قوانین کی خلاف ورزی کے لیے استثنیٰ کا احساس دلایا ہے۔ ایرانی قیادت کا یہ بیان ایک ایسے وقت میں سامنے آیا ہے جب خطے میں کشیدگی عروج پر ہے۔ عباس عراقچی نے واضح کیا کہ ایران اپنی دفاعی صلاحیتوں پر مکمل بھروسہ رکھتا ہے اور کسی بھی جارحیت کی صورت میں اپنی خودمختاری کا ہر قیمت پر تحفظ کرے گا۔