اے پی پیک یوتھ ونگ کا بڑا کارنامہ: نیویارک میں پہلے پاکستانی امریکن آرٹسٹس کنونشن کا کامیاب انعقاد

امریکن پاکستانی پبلک افیئرز کمیٹی (اے پی پیک) کے یوتھ ونگ نے ایک بڑا سنگِ میل عبور کرتے ہوئے نیویارک کے علاقے بروکلین میں پہلے پاکستانی امریکن آرٹسٹس کنونشن کا کامیاب انعقاد کیا۔

رولن اسٹوڈیوز بروکلین میں دن بھر جاری رہنے والے اس رنگا رنگ اور تخلیقی پروگرام میں فلم، ٹیلی وژن، موسیقی، فیشن، اینی میشن اور بصری فنون سے وابستہ نامور پاکستانی اور پاکستانی نژاد امریکی فنکار ایک ہی پلیٹ فارم پر جمع ہوئے۔ تقریب کا باضابطہ میڈیا پارٹنر ’ٹی وی ون یو ایس اے‘ تھا جس نے کنونشن کی بھرپور کوریج کی۔

کنونشن میں پاکستانی امریکن کمیونٹی کے نوجوانوں اور اہلِ خانہ نے بڑی تعداد میں شرکت کی۔ شرکاء نے نامور فنکاروں کی بصیرت افروز گفتگو کو بے حد سراہا، جس میں فنکاروں نے عالمی سطح پر اپنے شعبوں میں جگہ بنانے، اپنے تخلیقی فیصلوں پر اعتماد کرنے اور نئے منصوبوں کو عملی شکل دینے کے حوالے سے اپنے ذاتی تجربات بیان کیے۔ اے پی پیک کے نوجوانوں کی اس منفرد کاوش کی سب سے نمایاں بات یہ تھی کہ انہوں نے معاصر پاکستانی اور پاکستانی امریکن فن و ثقافت سے وابستہ تخلیق کاروں کو یکجا کر کے نئی نسل کو ان سے براہِ راست ملاقات اور رہنمائی حاصل کرنے کا نادر موقع فراہم کیا۔

کنونشن کے دوران مختلف موضوعات پر مبنی چار خصوصی پینل مباحثے منعقد کیے گئے،  اس سیشن میں میڈیا آرٹسٹ جہانزیب خواجہ، معروف بصری فنکار ساکس آفریدی اور پاکستان کی پہلی ہاتھ سے بنی اینی میٹڈ فلم ’دی گلاس ورکر‘ کے ہدایت کار عثمان ریاض نے اپنے تخلیقی سفر اور عالمی معیار کے کام کی تخلیق پر تفصیلی گفتگو کی۔  اس نشست میں گریمی ایوارڈ یافتہ ساؤنڈ انجینئر توریس حبیب اور ایمی ایوارڈ یافتہ ٹیلی وژن پروڈیوسر علیشہ ظفر نے بین الاقوامی فلم اور ٹیلی وژن کی صنعت میں کام کرنے کے چیلنجز اور کامیابی کے تجربات بیان کیے۔ اس سیشن میں اداکار و موسیقار شاہجہاں خان، گلوکارہ نتاشا نورانی اور عالمی شہرت یافتہ آرٹسٹ و فیشن ڈیزائنر میشا جاپان والا نے اپنی منفرد فنکارانہ شناخت بنانے اور ثقافتی جڑوں سے جڑے رہنے پر اظہارِ خیال کیا۔  شام کے سیشن میں مختصر فلموں ’پوسٹ ٹرم‘، ’رومی‘ اور ’جسٹ فرینڈز‘ کی خصوصی اسکریننگ کی گئی، جس کے بعد ان فلموں کے ہدایت کاروں سلیم ناصر گوندل، عائشہ امین اور عماد شیخ نے فلم سازی کی باریکیوں اور کہانی کے انتخاب پر اپنے تجربات شرکاء کے ساتھ شیئر کیے۔

پینل مباحثوں کے اختتام پر تمام فنکار نوجوانوں اور فیملیز کے ساتھ گھل مل گئے، جہاں شرکاء کو ان سے ان کے فن پاروں اور پراجیکٹس کے بارے میں براہِ راست گفتگو کرنے، اپنے دلچسپی کے شعبوں میں نئے پیشہ ورانہ رابطے بنانے اور مستقبل میں مشترکہ منصوبوں پر کام کرنے کے امکانات پر تبادلہ خیال کرنے کا بہترین موقع ملا۔

کنونشن کے احاطے میں فن پاروں کی ایک خصوصی نمائش بھی سجائی گئی تھی جسے حاضرین نے خوب سراہا، جبکہ اس یادگار تقریب کا اختتام معروف گلوکارہ نتاشا نورانی کی شاندار لائیو میوزک پرفارمنس کے ساتھ ہوا۔