صوابی کے عوام نے تحریک انصاف کے خلاف فیصلہ سنا دیا: امیر مقام

وفاقی وزیر برائے امورِ کشمیر و گلگت بلتستان انجینئر امیر مقام نے کہا ہے کہ صوابی کے عوام نے پاکستان تحریکِ انصاف (پی ٹی آئی) کے خلاف فیصلہ سنا دیا ہے اور صوبے میں انتظامی حوالے سے ہونے والی حالیہ تبدیلیوں کو عوام نے من و عن تسلیم کر لیا ہے۔ صوابی میں ایک جلسے سے خطاب کرتے ہوئے امیر مقام نے کہا کہ سوشل میڈیا پر جھوٹ پھیلانے والے صوابی کے عوام کا جوش و جذبہ دیکھ لیں، جہاں عوام کی بھرپور محبت اور تعاون اس بات کا ثبوت ہے کہ لوگ تبدیلی چاہتے ہیں۔ انہوں نے الزام عائد کیا کہ گزشتہ 13 سال کے دوران خیبرپختونخوا کو دونوں ہاتھوں سے بے دردی کے ساتھ لوٹا گیا اور پی ٹی آئی کے دورِ حکومت میں ہر طرف کرپشن کا راج رہا، تاہم اب صوبے کے وسائل عوامی مفاد کے منصوبوں اور فلاح و بہبود پر خرچ کیے جائیں گے اور عوام کے تعاون سے صوبے میں امن و امان کے قیام کے ساتھ ترقی کا نیا سفر شروع ہو گا۔