انتظامی ڈھانچے میں اصلاحات وقت کی اہم ضرورت ہیں: احسن اقبال

وفاقی وزیر احسن اقبال نے کہا ہے کہ ملک کے انتظامی ڈھانچے میں اصلاحات وقت کی اہم ضرورت ہیں اور انتظامی نظام کو عوامی ضروریات اور بدلتے ہوئے حالات کے مطابق تبدیل کرنا ہو گا، کیونکہ 50 سال پرانے انتظامی ڈھانچے سے چمٹے رہنا درست نہیں جبکہ اس عرصے کے دوران ملک کی آبادی، وسائل اور عالمی حالات میں نمایاں تبدیلی آ چکی ہے۔ اپنے آبائی حلقے نارووال میں ڈسٹرکٹ بار ایسوسی ایشن سے خطاب کرتے ہوئے ان کا کہنا تھا کہ اصلاحات ایک مسلسل عمل ہے جسے کسی صورت روکنا نہیں چاہیے اور سیاست دانوں کو وسیع تر قومی مفاد میں مل بیٹھ کر قومی مکالمے کے ذریعے انتظامی اصلاحات پر اتفاقِ رائے پیدا کرنا چاہیے۔ احسن اقبال نے مزید کہا کہ حکومت قانون کی حکمرانی اور عدلیہ کی آزادی پر مکمل یقین رکھتی ہے کیونکہ قانون کی بالادستی ہی ملک کی ترقی کی ضمانت ہے، جبکہ وکلاء برادری جمہوریت کا مضبوط ستون ہے اور بار اور بینچ کے باہمی تعاون سے عوام کو انصاف کی فراہمی کا نظام مزید مضبوط ہو گا۔