سہیل آفریدی اور بابر سلیم سواتی سمیت 9 ارکانِ اسمبلی کی حراست وفاقی آئینی عدالت میں چیلنج

تحریکِ تحفظِ آئینِ پاکستان کے سربراہ محمود خان اچکزئی اور مجلس وحدت مسلمین کے سربراہ علامہ راجہ ناصر عباس کی جانب سے ایڈووکیٹ معظم بٹ کے توسط سے سہیل آفریدی اور بابر سلیم سواتی سمیت 9 منتخب ارکانِ اسمبلی کی گرفتاری اور حراست کو وفاقی آئینی عدالت (ایف سی سی) میں چیلنج کر دیا گیا ہے۔ دائر کی گئی آئینی درخواست میں مؤقف اختیار کیا گیا ہے کہ بانی پی ٹی آئی نے محمود خان اچکزئی اور راجہ ناصر عباس کو حکومت سے مذاکرات کی ذمہ داری سونپی تھی، تاہم ریاستی مشینری کو سیاسی اختلاف دبانے اور منتخب نمائندوں کو حراست میں رکھ کر عوام کے انتخابی مینڈیٹ کو غیر مؤثر بنانے کے لیے استعمال کیا جا رہا ہے جو آئین کے آرٹیکل 4، 14، 17 اور 25 کی صریح خلاف ورزی ہے۔ درخواست میں اہم آئینی سوال اٹھاتے ہوئے کہا گیا ہے کہ کیا ریاستی ادارے منتخب نمائندوں کے پارلیمانی کردار اور سیاسی سرگرمیوں کو روک سکتے ہیں، جبکہ آرٹیکل 232، 234 اور 245 کے تحت حاصل غیر معمولی اختیارات یا گورنر راج کے نفاذ سے شہریوں کے بنیادی حقوق ختم نہیں ہوتے اور حکومتی اقدامات وفاقی آئینی عدالت کے عدالتی جائزے کے تابع ہیں۔ درخواست گزاروں نے حکومت سے زیرِ حراست تمام ارکانِ اسمبلی کے مقامِ حراست اور قانونی حیثیت کی واضح تفصیلات سامنے لانے، تمام متاثرہ ارکان کو عدالت میں پیش کرنے اور ان کی حراست کو غیر قانونی قرار دے کر فوری رہائی کا حکم دینے کی استدعا کی ہے۔