پاکستان کا بھارت میں ہونے والے ایس سی او اجلاس میں شرکت کا فیصلہ

ترجمان دفترِ خارجہ کے مطابق حکومتِ پاکستان نے بھارت میں منعقد ہونے والے شنگھائی تعاون تنظیم (ایس سی او) کے تہذیبی مکالمے میں شرکت کا باضابطہ فیصلہ کر لیا ہے، جس میں پاکستان کی نمائندگی کے لیے وفاقی وزیر مصدق مسعود ملک کو نامزد کیا گیا ہے۔ دفترِ خارجہ کی جانب سے جاری بیان میں بتایا گیا کہ 20 سے 22 نومبر تک نئی دہلی میں ہونے والے اس اجلاس میں ایس سی او کے رکن ممالک کے نمائندے شریک ہوں گے، جہاں تہذیبی مکالمے اور ثقافتی ہم آہنگی سے متعلق امور پر تبادلہ خیال کیا جائے گا۔ ترجمان دفترِ خارجہ کا مزید کہنا تھا کہ حکومتِ پاکستان باہمی احترام کے جذبے کے تحت شنگھائی تعاون تنظیم کے پلیٹ فارم پر تہذیبوں کے درمیان مکالمے کو فروغ دینے اور رکن ممالک کے مابین عوامی سطح پر روابط مضبوط بنانے کے عزم پر قائم ہے۔