نو مئی ریڈیو حملہ کیس: سہیل آفریدی کے خلاف اشتہاری کی کارروائی شروع

انسدادِ دہشت گردی عدالت پشاور نے نو مئی ریڈیو پاکستان حملہ کیس میں نامزد ملزمان سہیل آفریدی اور عامر چمکنی کے خلاف اشتہاری قرار دینے کی قانونی کارروائی شروع کرتے ہوئے ضابطہ فوجداری کی دفعہ 87 کے تحت نوٹس جاری کر دیے ہیں۔ پراسیکیوشن حکام کے مطابق دونوں ملزمان کے خلاف جاری کیے گئے دفعہ 87 کے نوٹسز ان کے گھروں اور دفاتر پر آویزاں کیے جائیں گے، اور مقررہ مدت میں عدالت کے روبرو پیش نہ ہونے کی صورت میں انہیں ضابطہ فوجداری کی دفعہ 512 کے تحت باقاعدہ اشتہاری قرار دے کر ان کے دائمی وارنٹِ گرفتاری جاری کر دیے جائیں گے۔ حکام کا مزید کہنا ہے کہ سہیل آفریدی کو ریڈیو پاکستان کی درخواست پر اس مقدمے میں نامزد کیا گیا تھا، جبکہ ریڈیو پاکستان حملہ کیس میں مجموعی طور پر 80 سے زائد ملزمان نامزد ہیں اور مقدمے کا ٹرائل عدالت میں زیرِ سماعت ہے۔