عالمی بینک نے دیہی سندھ میں صاف پانی اور صفائی کی سہولیات کے لیے 30 کروڑ ڈالر کی منظوری دے دی

عالمی بینک نے سندھ کے دیہی علاقوں میں صاف پانی، نکاسی آب اور صفائی کی جدید سہولیات کی فراہمی کے لیے 30 کروڑ ڈالر کی مالی معاونت کی منظوری دے دی ہے، جس سے صوبے کی تقریباً 15 لاکھ دیہی آبادی براہِ راست مستفید ہو گی۔ عالمی بینک کے مطابق یہ منصوبہ پاکستان کے دیہی علاقوں میں پانی اور صفائی کے نظام کو بہتر بنانے کے چار مراحل پر مشتمل 10 سالہ پروگرام کا پہلا مرحلہ ہے جس کی مجموعی مالیت 54 کروڑ ڈالر ہے، جس میں ایشیائی ترقیاتی بینک (اے ڈی بی) 15 کروڑ ڈالر جبکہ حکومتِ سندھ 9 کروڑ ڈالر کے مساوی حصہ فراہم کرے گی۔ منصوبے کے تحت دیہی سندھ میں پانی اور نکاسی آب کا جدید انفراسٹرکچر تعمیر کرنے کے ساتھ ساتھ شمسی توانائی سے چلنے والے واٹر سپلائی سسٹمز نصب کیے جائیں گے اور 80 فیصد ہدفی آبادی کو پیشہ ورانہ سروس فراہم کرنے والے ادارے سے منسلک کیا جائے گا، جبکہ استعمال کے مقام پر پانی کی آلودگی میں 50 فیصد کمی لانے کا ہدف بھی مقرر کیا گیا ہے۔ عالمی بینک کا کہنا ہے کہ دیہی سندھ میں پانچ سال سے کم عمر نصف سے زائد بچے آلودہ پانی اور ناقص صفائی کے باعث غذائی قلت اور نشوونما کی کمی (اسٹنٹنگ) کا شکار ہیں، اس لیے اس منصوبے کا بنیادی مقصد صحت کے ان مسائل پر قابو پانا ہے، جبکہ اس کے نفاذ سے 14 ہزار سے زائد روزگار کے نئے مواقع پیدا ہونے کا بھی تخمینہ لگایا گیا ہے۔