اقوامِ متحدہ کا آبنائے ہرمز اور بحیرہ احمر میں محفوظ بحری آمدورفت بحال کرنے پر زور

اقوامِ متحدہ کے ایک اعلیٰ عہدیدار نے دوٹوک الفاظ میں خبردار کیا ہے کہ آبنائے ہرمز اور باب المندب کے اطراف تجارتی جہاز رانی پر بڑھتی ہوئی کشیدگی اور مسلسل حملے عالمی امن و سلامتی، علاقائی استحکام اور مجموعی عالمی معیشت کے لیے ایک سنگین خطرہ بن رہے ہیں۔

ترکیہ کی سرکاری خبر رساں ایجنسی کے مطابق، مشرقِ وسطیٰ، ایشیا اور بحرالکاہل کے امور کے لیے اقوامِ متحدہ کے اسسٹنٹ سیکرٹری جنرل خالد خیاری نے اقوامِ متحدہ کی سلامتی کونسل کے اجلاس سے ورچوئل خطاب کرتے ہوئے تشویش کا اظہار کیا کہ ان اہم آبی گزرگاہوں میں سمندری واقعات میں مسلسل اضافہ ہو رہا ہے۔

انہوں نے سلامتی کونسل کو آگاہ کیا کہ عالمی تجارت کے لیے اہم بحری جہازوں کو مختلف نوعیت کے حملوں کا سامنا ہے، جبکہ اس کشیدگی کے باعث متعدد تجارتی جہاز اور ان کے عملے کے ارکان کئی ماہ سے خلیج کے اندر پھنسے ہوئے ہیں۔ خالد خیاری نے اس بات پر زور دیا کہ بین الاقوامی قوانین کے تحت سویلین جہازوں اور تجارتی بحری جہازوں کو کسی بھی صورت نشانہ نہیں بنایا جانا چاہیے۔

اپنے خطاب کے دوران اسسٹنٹ سیکرٹری جنرل نے اقوامِ متحدہ کے سیکرٹری جنرل انتونیو گوتریس کے ان شدید خدشات کو بھی دہرایا جو انہوں نے دنیا کی ان انتہائی اہم اور تزویراتی آبی گزرگاہوں میں جاری کشیدگی اور اس کے ممکنہ تباہ کن عالمی خطرات کے حوالے سے ظاہر کیے تھے۔