بھارت کے آسام میں منی بس اور ٹرک کا خوفناک تصادم، 26 افراد ہلاک

بھارتی ریاست آسام میں ایک تیز رفتار منی بس اور ٹرک کے درمیان ہونے والے انتہائی خوفناک ٹریفک تصادم کے نتیجے میں کم از کم 26 افراد موقع پر ہی ہلاک جبکہ 20 شدید زخمی ہو گئے ہیں۔

بھارتی میڈیا رپورٹس کے مطابق اس المناک حادثے میں منی بس میں سوار بیشتر مسافر مقامی کالج کے طالب علم تھے، جو اپنی روزمرہ کلاسز ختم ہونے کے بعد واپس اپنے گھروں کو لوٹ رہے تھے کہ راستے میں موت کا شکار ہو گئے۔ مقامی پولیس نے تصدیق کرتے ہوئے بتایا کہ یہ ہولناک حادثہ قازیگار کے علاقے کے قریب اس وقت پیش آیا جب گولاگھاٹ سے ناگاؤں کی جانب جانے والی مسافر منی بس سامنے سے آنے والے ایک تیز رفتار ٹرک سے شدید تصادم کا شکار ہو گئی۔

پولیس حکام کے مطابق حادثے کی اطلاع ملتے ہی ریسکیو ٹیمیں موقع پر پہنچ گئیں اور تمام 20 زخمی افراد کو فوری طبی امداد کے لیے قریبی اسپتالوں میں منتقل کر دیا گیا، جہاں متعدد زخمیوں کی حالت نازک ہونے کے باعث حکام نے ہلاکتوں میں مزید اضافے کا خدشہ بھی ظاہر کیا ہے۔ مقامی انتظامیہ اور پولیس نے واقعے کی وجوہات جاننے کے لیے باضابطہ تحقیقات کا آغاز کر دیا ہے، تاہم ابتدائی طور پر حادثے کی اصل وجہ سامنے نہیں آ سکی ہے۔