سیاسی سرگرمیاں تیز، بلاول بھٹو اسلام آباد پہنچ گئے، اہم ملاقاتیں متوقع

پاکستان پیپلز پارٹی کے چیئرمین بلاول بھٹو زرداری کراچی سے وفاقی دارالحکومت اسلام آباد پہنچ گئے ہیں، جہاں ان کی حکومتی اور پارٹی قیادت سے اہم ملاقاتیں متوقع ہیں۔ پارٹی ذرائع کے مطابق اس دورے کے دوران بلاول بھٹو زرداری پارلیمنٹ میں پیش کیے جانے والے نئے مجوزہ بلوں کے حوالے سے پارٹی رہنماؤں سے تفصیلی مشاورت کریں گے، جس میں ان بلوں پر پیپلز پارٹی کے تحفظات، تجاویز اور آئندہ کے لائحہ عمل پر غور کر کے پارٹی کا حتمی مؤقف طے کیا جائے گا۔ ذرائع کا مزید کہنا ہے کہ وزیراعظم سے حالیہ ملاقات میں بلاول بھٹو زرداری کو مجوزہ قانون سازی سے متعلق تحفظات دور کرنے کی یقین دہانی کرائی گئی تھی، جس کے تناظر میں چیئرمین پیپلز پارٹی حکومتی یقین دہانیوں اور بلوں کے مسودوں کا جائزہ لیں گے جبکہ حکومت اور پیپلز پارٹی کے درمیان قانون سازی کے امور پر مشاورت کا نیا دور بھی متوقع ہے۔