ریکوڈک منصوبہ پاکستان کے معاشی مستقبل کیلئے کلیدی اہمیت رکھتا ہے: وزیراعظم

وزیراعظم شہباز شریف سے بیرک مائننگ کارپوریشن کے چیئرمین جان تھورنٹن کی سربراہی میں وفد نے ملاقات کی، جس میں معدنی شعبے کی ترقی، ریگولیٹری فریم ورک اور سرمایہ کاری کے نئے مواقع پر تفصیلی تبادلہ خیال کیا گیا۔ ملاقات کے دوران وزیراعظم شہباز شریف نے کہا کہ پاکستان کے قدرتی و معدنی وسائل سے استفادہ کر کے بلوچستان کی ترقی اور مقامی عوام کی خوشحالی حکومت کی اولین ترجیح ہے، جبکہ ریکوڈک منصوبے کی کامیابی ملک میں مستقبل کی غیر ملکی سرمایہ کاری کے لیے ایک مثالی معیار قائم کرے گی اور مقامی نوجوانوں کے لیے روزگار و ہنرمندی کے نئے مواقع پیدا ہوں گے۔ وزیراعظم نے ریکوڈک کے علاوہ دیگر معدنی منصوبوں میں بھی بیرک مائننگ کی مہارت سے استفادہ کرنے کی خواہش ظاہر کی، جس پر وفد نے منرلز انویسٹمنٹ فورم کے انعقاد کو سراہتے ہوئے کراچی اور گوادر میں منرل پراسیسنگ کی صنعت کے قیام میں سرمایہ کاری کے لیے گہری دلچسپی کا اظہار کیا۔ ملاقات میں نائب وزیراعظم اسحاق ڈار، وفاقی وزراء محمد اورنگزیب اور علی پرویز ملک سمیت متعلقہ اعلیٰ حکام بھی شریک تھے۔