سپریم کورٹ میں زیر التوا فوجداری مقدمات نمٹانے کے لیے اہم فیصلہ

سپریم کورٹ آف پاکستان میں زیر التوا فوجداری مقدمات کو جلد نمٹانے کے لیے چیف جسٹس پاکستان جسٹس یحییٰ آفریدی نے اہم پیش رفت کرتے ہوئے لاہور ہائیکورٹ کے دو ججز کو چھ ماہ کے لیے عدالتِ عظمیٰ میں ایڈہاک جج مقرر کرنے کی تجویز پر غور شروع کر دیا ہے۔ ذرائع کے مطابق چیف جسٹس بطور چیئرمین جوڈیشل کمیشن رواں ماہ کمیشن کا اجلاس طلب کریں گے جس میں ان تعیناتیوں کی منظوری کا امکان ہے، جبکہ اس سے قبل چیف جسٹس نے لاہور ہائیکورٹ کے راولپنڈی بینچ کے ججز جسٹس صداقت علی خان، جسٹس سید شہباز رضوی، جسٹس مرزا وقاص رؤف، جسٹس محمد رضا قریشی اور جسٹس سید فرہاد علی شاہ کو کھانے پر مدعو کر کے عدالتی امور اور زیر التوا مقدمات کو تیزی سے نمٹانے کے حوالے سے تفصیلی تبادلہ خیال بھی کیا۔