ملک کے بیشتر علاقوں میں تیز ہواؤں، بارش اور برفباری کا امکان، الرٹ جاری

نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر (این ای او سی) نے ملک کے بالائی و میدانی علاقوں میں متوقع موسمی صورتحال کے پیشِ نظر الرٹ جاری کر دیا ہے، جس کے مطابق اسلام آباد، راولپنڈی، خطہ پوٹھوہار، خیبرپختونخوا، گلگت بلتستان اور آزاد کشمیر میں تیز ہواؤں اور گرج چمک کے ساتھ بارش متوقع ہے جبکہ مری، گلیات، خطہ پوٹھوہار اور خیبرپختونخوا کے بالائی اضلاع دیر، چترال، سوات، کوہستان، شانگلہ، بٹگرام، مانسہرہ اور ایبٹ آباد میں موسلادھار بارش کا امکان ہے۔ الرٹ میں بتایا گیا ہے کہ پہاڑی علاقوں میں برفباری اور بعض مقامات پر ژالہ باری کے باعث لینڈ سلائیڈنگ اور سڑکوں پر پھسلن کا خدشہ ہے، دوسری جانب پنجاب کے میدانی علاقوں نارووال، سیالکوٹ، گوجرانوالہ، لاہور، خانیوال، فیصل آباد، ملتان، کوٹ ادو اور بہاولپور میں رات کے اوقات میں دھند اور سموگ چھانے کی پیشگوئی کی گئی ہے۔ این ڈی ایم اے نے شہریوں کو پہاڑی علاقوں میں غیر ضروری سفر سے گریز کرنے اور متعلقہ اداروں کو ممکنہ موسمی خطرات سے نمٹنے کے لیے الرٹ رہنے کی ہدایت کر دی ہے۔