درہ آدم خیل سے لاہور اسلحہ لانے والا غیر قانونی نیٹ ورک بے نقاب، 8 ملزم گرفتار

رائیونڈ پولیس نے تین مختلف کارروائیوں کے دوران درہ آدم خیل سے لاہور غیر قانونی اسلحہ اور گولیاں منتقل کرنے والے بین الصوبائی نیٹ ورک کے 8 ملزمان کو گرفتار کر کے ان کے قبضے سے بھاری مقدار میں اسلحہ، گولیاں اور تین گاڑیاں برآمد کر لی ہیں۔ ترجمان ڈی آئی جی آپریشنز کے مطابق ملزمان مختلف گاڑیوں کے ذریعے اسلحہ منتقل کر رہے تھے جہاں ایک گاڑی سے 2 رائفلیں، ایک 12 بور رپیٹر اور 500 گولیاں، دوسری گاڑی سے 3 رائفلیں، 3 عدد 12 بور رپیٹر، 44 پسٹل اور 9 ہزار گولیاں جبکہ تیسری گاڑی سے 15 ہزار پسٹل کی گولیاں برآمد ہوئیں، یوں مجموعی طور پر 5 رائفلیں، 4 عدد 12 بور رپیٹر، 44 پسٹل اور 24 ہزار 500 گولیاں قبضے میں لی گئیں۔ ابتدائی تفتیش کے مطابق گرفتار ملزمان طارق، فرحان، یوسف، علی حیدر، سحر گل، حضرت گل، سراج خان اور عبدالحسیب میں سے 5 کا تعلق خیبرپختونخوا کے علاقوں پشاور، کوہاٹ اور درہ آدم خیل جبکہ 3 کا تعلق رائیونڈ لاہور سے ہے۔ ڈی آئی جی آپریشنز فیصل کامران کا کہنا ہے کہ ملزمان سے اسلحے کی خرید و فروخت اور ترسیل کے حوالے سے مزید تفتیش جاری ہے، جبکہ غیر قانونی اسلحے کی سمگلنگ کے خلاف زیرو ٹالرنس پالیسی کے تحت شہریوں کے جان و مال کا تحفظ یقینی بنایا جا رہا ہے۔