ملک بھر کی عدالتوں میں ویمن فیسیلی ٹیشن سینٹرز کے قیام کا فیصلہ

چیف جسٹس آف پاکستان جسٹس یحییٰ آفریدی کی زیرِ صدارت لا اینڈ جسٹس کمیشن آف پاکستان کا اجلاس منعقد ہوا، جس میں ملک بھر میں ویمن فیسیلیٹیشن سینٹرز کے قیام پر پیشرفت کا جائزہ لیتے ہوئے پہلے مرحلے میں چاروں صوبوں میں ایک، ایک سینٹر قائم کرنے کا فیصلہ کیا گیا ہے۔ اجلاس میں رجسٹرار سپریم کورٹ، سیکرٹری لا اینڈ جسٹس کمیشن کیپٹن (ر) مشتاق احمد، نیسپاک (NESPAK) اور انسٹیٹیوٹ آف آرکیٹیکٹس پاکستان کے نمائندگان سمیت ڈیزائن مقابلے میں کامیاب ہونے والے آرکیٹیکٹس نے شرکت کی۔ چیف جسٹس یحییٰ آفریدی نے کہا کہ سال 2026-27ء میں چاروں صوبوں اور اسلام آباد میں ان مراکز کا قیام اہم ترجیح ہے، جہاں خواتین سائلین کو ون ونڈو سہولت کے تحت ایک ہی چھت تلے قانونی مشاورت، ثالثی، نفسیاتی و سماجی معاونت، علیحدہ مشاورتی کمرے، بچوں سے باوقار ملاقات کی جگہ اور معذور خواتین کے لیے ریمپس سمیت تمام ضروری سہولیات فراہم کی جائیں گی۔ اجلاس میں بتایا گیا کہ چاروں ہائیکورٹس کی مشاورت سے پہلے چار مراکز کے لیے جگہوں کی نشاندہی مکمل کر لی گئی ہے، جبکہ چیف جسٹس نے نیسپاک اور انسٹیٹیوٹ آف آرکیٹیکٹس پاکستان کے اسلام آباد راولپنڈی چیپٹر کو ان مراکز کی تعمیر اور ڈیزائن پر فوری کام شروع کرنے کی ہدایت کر دی ہے۔