ایران نے ارجنٹینا کی بحریہ اور فضائیہ کو دہشت گرد تنظیمیں قرار دے دیا

ایران نے جوابی سفارتی و قانونی اقدام اٹھاتے ہوئے ارجنٹینا کی بحریہ اور فضائیہ کو باضابطہ طور پر دہشت گرد تنظیمیں قرار دے دیا ہے۔

ایرانی وزارت خارجہ کی جانب سے جاری بیان کے مطابق یہ فیصلہ ارجنٹینا کی حکومت کی طرف سے ایرانی پاسدارانِ انقلاب (IRGC) کو دہشت گرد تنظیم قرار دینے کے ردعمل میں کیا گیا ہے۔ وزارت خارجہ کا کہنا ہے کہ ایران نے بین الاقوامی اصولِ باہمی (Reciprocity) کی بنیاد پر ارجنٹینا کی مسلح افواج کے ان دونوں شعبوں کو دہشت گرد فہرست میں شامل کیا ہے۔

ایرانی وزارت خارجہ نے سخت انتباہ جاری کرتے ہوئے کہا ہے کہ اس فیصلے کے تمام تر ممکنہ نتائج اور مضمرات کی ذمہ داری براہِ راست ارجنٹینا کی حکومت پر عائد ہوگی۔ واضح رہے کہ ارجنٹینا نے رواں سال اپریل میں ایرانی پاسدارانِ انقلاب کو دہشت گرد تنظیم قرار دیا تھا، جس کے بعد دونوں ممالک کے درمیان سفارتی تعلقات شدید تناؤ کا شکار ہیں۔