غیر قانونی گولڈ مائننگ کیخلاف کوہاٹ پولیس کا گرینڈ آپریشن، دہشتگردوں کا حملہ، 8 اہلکار زخمی

دہشت گردوں اور جرائم پیشہ عناصر کا گٹھ جوڑ توڑنے کے مشن کے تحت غیر قانونی گولڈ مائننگ کے خلاف کوہاٹ پولیس نے گرینڈ آپریشن کیا، جس کے دوران تھانہ گمبٹ کی حدود میں دہشت گردوں نے پولیس نفری پر گھات لگا کر حملہ کر دیا۔

حملے کے نتیجے میں 8 پولیس اہلکار زخمی ہو گئے جنہیں فوری طبی امداد کے لیے قریبی اسپتال منتقل کر دیا گیا ہے، جبکہ بعض اہلکاروں کی شہادتوں کا بھی خدشہ ظاہر کیا جا رہا ہے۔ حملے کے فوراً بعد پولیس اور سکیورٹی فورسز نے بھرپور اور مؤثر جوابی کارروائی کرتے ہوئے متعدد خارجی دہشت گردوں کو جہنم واصل کر دیا۔

ڈسٹرکٹ پولیس آفیسر (ڈی پی او) کوہاٹ کے مطابق فتنہ الخوارج اور جرائم پیشہ افراد کے گٹھ جوڑ نے پولیس نفری پر چھپ کر حملہ کیا۔ انہوں نے واضح کیا کہ علاقے میں فرار ہونے والے خارجی دہشت گردوں کا تعاقب جاری ہے اور آخری دہشت گرد کے خاتمے تک یہ کلین اپ آپریشن بلا تعطل جاری رہے گا۔