مولانا فضل الرحمٰن کے سیکرٹری مفتی ابرار کے خلاف انسدادِ دہشت گردی کا مقدمہ درج، جے یو آئی کی شدید مذمت

جمعیت علمائے اسلام (ف) کے سربراہ مولانا فضل الرحمٰن کے سیکرٹری مفتی ابرار احمد اور 200 سے زائد نامعلوم کارکنوں کے خلاف انسدادِ دہشت گردی سمیت دیگر سنگین دفعات کے تحت مقدمہ درج کر لیا گیا ہے۔ ایف آئی آر میں تعزیراتِ پاکستان کی دفعات 353، 186، 148، 341 اور 440 کے ساتھ ساتھ انسدادِ دہشت گردی ایکٹ کی دفعات 7، 21(1) اور 11 بھی شامل کی گئی ہیں۔ مقدمے میں مفتی ابرار اور کارکنوں پر پولیس اہلکاروں پر تشدد کا الزام عائد کیا گیا ہے، جبکہ دوسری جانب جے یو آئی کے رہنماؤں کی گرفتاری کے لیے چھاپے مارے جا رہے ہیں۔ ترجمان جے یو آئی نے واقعے اور چھاپوں کی شدید مذمت کرتے ہوئے کہا کہ سیاسی اختلاف کا جواب ریاستی طاقت اور جھوٹے مقدمات سے دینا جمہوری اقدار کے منافی ہے، اور پولیسی دباؤ کے ذریعے پارٹی کو اصولی موقف سے دستبردار نہیں کرایا جا سکتا۔